Қарағанды құтқарушыларында 25 қабатты үйлерде өрт сөндіру үшін жаңа мүмкіндіктер пайда болды
Қарағандыда биік ғимараттардағы өрттерді сөндіру мүмкіндіктері көрсетілді. Биыл облыстық ТЖД өзінің техникалық базасын толықтырды. Жаңа техника арасында заманауи жанармай құюшы және АЦ-5-40 Iveco Euro Cargo ML190 екі автоцистерна бар. Сондай-ақ газ-түтіннен қорғау қызметінің автомобилі мен 9 метрлік катер жеткізіліп, оны Балқашқа жеткізу жоспарланып отыр.
«Қыс-2021» командалық-штабтық оқу-жаттығулары кезінде азаматтық қорғау қызметтері мен құралымдарының қысқы кезеңдегі төтенше жағдайларға ден қоюға дайындығын тексеру жүргізілді. Мұндай жаттығулар жыл сайын өткізіледі. Биыл үйлестіру және басшылық жөніндегі штаб Қарағандыда орналасқан. Төтенше жағдайлар кезіндегі іс-қимыл алгоритмдерін құтқарушылар екі күн аралығында – 11 және 12 қарашада пысықтайды.
Оқу-жаттығуға қатысушылардың назарын ТЖД-нің екі жаңа автоцистернасы аударды. Бұл елдегі алғашқы осындай техника. Әрбір машина су ерітінділерін көбіктендіргішпен беру мүмкіндігі бар ықшам немесе шашыратылған су ағынын беретін VARIO өрт сөндіру аспалы қондырғысының үш бірлігімен жабдықталған. Биік объектілердегі өрттерді сөндіру үшін автоцистерна жоғары жылдамдықты су ағынымен жоғары қысымды Limens автономды сорғы қондырғысымен жабдықталған. Оны бір немесе бірнеше басқа автоцистерналармен «айдау» арқылы жұмыс істеген кезде дербес жауынгерлік бірлік ретінде, сондай-ақ сорғы қондырғысы ретінде пайдалануға болады. Өрт сөндірушілер бұл машинаның жұмысын көрсетті.
– Оқу-жаттығудың негізгі міндеті – қысқы кезеңдегі ТЖ қаупі немесе оның туындауы жағдайында күштер мен құралдардың іс-қимылға дайындығын бағалау. Облыста қар басатын 590 учаске бақылауға алынды. Олар бізге, ІІМ органдарына, жол ұйымдарына белгілі. Олардың жалпы ұзындығы 705 шақырым. Жалпы облыс бойынша қыс мезгілінде ТЖ алдын алу және жою үшін 3 мыңға жуық адам мен түрлі ұйымдардың 1 300 бірлік техникасын тарту жоспарлануда, – деді ТЖД бастығы Мұрат Қатпанов.
«Қыс-2021» шарасына апаттық-құтқару қызметтерінің құрамына кіретін ҚР ТЖМ аумақтық бөлімшелерінің жедел-құтқару құрамалары, ҚР ТЖМ 52859 әскери бөлімі қатысты. Олардың барлығы қолда бар күштер мен құралдардың дайындығын көрсетті. Далалық басқару пунктінің жұмысын көрсетті, онда қажетті байланыс түрлерімен жабдықталған штабтық шатыр, медициналық қамтамасыз ету, тамақтану, жылыту және психологиялық көмек пункттері ашылды. Сондай-ақ өтімділігі жоғары автомашиналар базасындағы жылжымалы байланыс тораптарының мүмкіндіктері көрсетілді.
Тәжірибелік іс-шаралар шеңберінде Қарағанды облысының Азаматтық қорғау апаттық-құтқару құрамаларының, жылжымалы басқару пунктінің және шатыр лагерінің дайындық байқаулары өткізілді.