Қарағандылық жұмыс берушілер медициналық сақтандыру қорына қаражат аудару бойынша өңірлер арасында көш бастап тұр

Қарағанды облысының жұмыс берушілері медициналық сақтандыру қорына 16 млрд теңгеден астам ақша аударған. Республика бойынша барлық түсімдердің 8,2%-ы біздің өңірге тиесілі. Бұл Алматы (20,7%) және Нұр-Сұлтан (12,4%) қалаларынан кейін еліміз бойынша үшінші орын, ал облыстар арасында бірінші орын.
Республикада 2017 жылдың 1 шілдесінен бастап 2019 жылдың 31 шілдесіне дейінгі кезеңде жұмыс берушілер мен жеке кәсіпкерлер міндетті медициналық сақтандыру үшін 195,7 млрд теңге аударған.
- Қарағанды облысы бойынша қорға аударымдардың жалпы сомасы 16,02 млрд теңгені құрады, оның ішінде 15,4 млрд теңге (96,1%) жұмыс берушілердің аударымдары, 606,7 млн теңге (3,9%) – азаматтық-құқықтық сипаттағы шарттар бойынша жұмыс істейтін жеке кәсіпкерлер мен тұлғалардың жарнасы, - деп түсіндірді «Әлеуметтік медициналық сақтандыру қоры» КЕАҚ Қарағанды облысы бойынша филиалының директоры Фазыл Копобаев.
МӘМС-дан түскен барлық қаражат сенімгерлік басқару шарты жасалған Ұлттық банкте сақталады. Кейіннен бұл ақша медициналық сақтандыру бойынша қызметтерге ақы төлеуге жұмсалады.