Жерлестерді қолдау: Қарағандыда 42 волонтерлік ұйым жұмыс істейді
Қарағанды Жастар ресурстық орталығының еріктілері 480 отбасына, оның ішінде 1 153 адамға қолдау көрсетеді. Бұл адамдарға тұрақты негізде көмек көрсетіледі. Олардың көпшілігі зейнеткерлер.
2020 жылдан бастап Қалалық ресурстық орталық Jastar birge жобасын іске асыруда. Оның мақсаты – жастар арасында волонтерлік қызметті дамыту және танымал ету.
– Қазіргі уақытта қаламызда 42 волонтерлік ұйым жұмыс істейді. Бұл негізінен студенттер, бірақ мектеп оқушылары да, ересектер де бар. Игі істерді біз кәсіпкерлердің демеушілігімен жүзеге асыра аламыз, – дейді Қарағанды қаласының Жастар ресурстық орталығының басшысы Сымбат Әубәкірова. – Пандемия басылып, жұмыс азая бастаған сияқты. Еріктілер шынымен мұқтаж жандарға – жалғыз басты зейнеткерлерге, мүмкіндігі шектеулі адамдарға, аз қамтылған және көп балалы отбасыларға көмектеседі.
Орталықта көптеген жобалар мен тұрақты акциялар бар. «Ардағым – Ардагерім» жобасы аясында еріктілер жалғыз тұратын зейнеткерлер мен ҰОС және еңбек ардагерлеріне көмек көрсетуде. Олар үйлерді тазалайды, азық-түлік пен дәріханаға барады, емханаларға, банктерге және поштаға барады.
Ай сайын еріктілер қажетті тауарлардан құралған азық-түлік себеттерін тасымалдайды. Оларды көп балалы және аз қамтылған отбасылар, мүмкіндігі шектеулі адамдар және мүгедек балаларды тәрбиелеп отырған отбасылар алады. Ай сайын еріктілер 20 жаңа отбасына барады. Акция жарты жылға есептелген.
Еріктілер тұрғындар арасында коронавирус туралы түсіндіру жұмыстарын жүргізеді. Ақпараттық буклеттер мен медициналық маскалар таратады.
Жастардың есірткі және психотроптық заттарды тұтынуының алдын алу бойынша полиция қызметкерлерімен сенбіліктер мен бірлескен іс-шараларға қатысады.
14 жасқа толған кез келген қарағандылық ерікті бола алады. Орталықта жаңадан келгендер тегін оқудан өтеді. Заңдар мен мінез-құлық этикасын түсіндіру бойынша дәрістер өткізіледі. Ұлттық еріктілер желісінің жетекшілері өз тәжірибелерімен бөліседі. Мұнда олар алғашқы медициналық көмек көрсету тәжірибесін және ТЖ кезінде көмек көрсету дағдыларын алады.
Жанарай Санақбай 2019 жылы ерікті болып қызмет етті. Бойжеткен әрқашан мұқтаж жандаға көмектескісі келді және оның қажеттілігін сезінеді. Бүгінде ол VolteQ еріктілер корпусының жетекшісі.
– Қазір біз Jastar birge жобасы бойынша жұмыс істеп жатырмыз. Ай сайын аз қамтылған отбасыларға азық-түлік жеткіземіз. Есірткі заттарының жарнамасын бояу бойынша полиция басқармасымен бірлескен рейдтерге барамыз. Қарт адамдарға тұрмыста көмектесеміз, – дейді Жанарай Санақбай. – Мен ерікті болуды шештім, себебі бұл игі істер үшін адамдардан алғыс аламыз. Сіз көмектесетін адамдардың қуанышты жүздері ерекше сезім сыйлайды. Әсіресе көп балалы отбасылармен жұмыс істегенді ұнатамын. Балалардың эмоциясы, көңілі мен күлкісі ештеңемен салыстыруға келмейді. Мен медбике мамандығында оқимын, бірақ мен еріктілер саласында әрі қарай қызмет етемін деп шештім.
Төрт ай бұрын зейнеткер Валентина Красноваға оның танысы еріктілердің телефон нөмірін берген. 76 жастағы әйел қатты ауырып қалып, оған үйде көмек қажет болды. Валентина Краснованың екі ұлы бар, олардың бірі Қарағандыда тұрады, сондықтан кейуанаға әлеуметтік қызметкер тиесілі емес.
– Бірақ ұлым да ауырады, қант диабеті бар. Келінімнің де анасы қатты ауырады. Сондықтан ешкімнен көмек сұрай алмаймын, – дейді әйел. – Еріктілерге рахмет. Олар маған бес-алты рет келді. Дүкенге бірнеше рет барды. Олар үйімді жинап, тіпті перделерді шешуге көмектесті, содан кейін келіп, іліп берді. Үйім таза, одан артық не қажет. Еріктілер қозғалысы өте қажет. Көптеген зейнеткерлер қарапайым көмекке мұқтаж болғанда, жүгінетін жерлері болмайды. Қазір өзімді жақсы сезінемін, әзірге көмек сұрамауға тырысамын – ол басқаларға қажетірек.