Бір миллионнан астам адам онлайн-режимде халық санағына қатысты
Қазақстанда онлайн-санақтан өткендердің саны миллион адамнан асты. Бұл туралы Ұлттық статистика бюросының басшысы Нұрболат Айдапкелов мәлімдеді.
– Қазіргі уақытта онлайн-санақтан өткендердің саны бойынша екі мегаполис – Алматы мен Нұр-Сұлтан тұрғындары көш бастап тұр. Ең аз көрсеткіш Солтүстік Қазақстан және Атырау облыстарында тіркелді, - деді Нұрболат Айдапкелов.
Қазіргі уақытта респонденттер үшін халық санағын қашықтықтан өткізу үшін бірнеше платформа көзделген:
- sanaq.gov.kz мамандандырылған сайты;
- е-Gov порталында авторизациялау;
- Aitu қосымшасы.
Бүкіл отбасының сауалнамаларын бір адам толтыра алады.
Азаматтарға ыңғайлы болу үшін ХҚКО-ларда, Статистика департаменттерінде, «Қазпошта» филиалдарында және ірі сауда ойын-сауық орталықтарында халық санағын жүргізетін арнайы орындар жұмыс істейді.
Ұлттық статистика бюросы адамдарды онлайн режимде халық санағынан өтуге шақырады.
Sanaq.gov.kz сайты 15 қазанға дейін тәулігіне 24 сағат қол жетімді.
Онлайн-санақтан өтпегендерге сұхбат алушылар 1-30 қазан аралығында сұрақ қояды.
Барлық сұрақтарға жауап алу үшін тәулік бойы жұмыс істейтін 1446 нөмірі бойынша Call-орталыққа хабарласуға болады. Қоңырау шалу тегін.