Қаражал мектептерінің бірінде өлкетану мұражайы ашылды

Қаражалдың №1 жалпы білім беретін орта мектебінде өлкетану мұражайы пайда болды. Ол "Қазақстан Тәуелсіздігінің 30 жылдығына 30 витрина" қағидаты бойынша жасалған. Мұражайда ондаған экспонат бар.

Онда кенді қаланың өнеркәсіптік байлығымен танысуға, аймақта өмір сүретін өсімдіктер мен жануарлар туралы ақпарат алуға болады. Сонымен қатар, мұнда еңбек ардагерлері, Қаражал кен орнын игеруге қатысқан адамдар және қаланы басқарған адамдар туралы ақпарат ұсынылған.

– Біздің мұражай экспонаттармен одан әрі толықтырылатын болады. Сондай-ақ, мектепте Қойшыбай Дәулеткәрімов атындағы математика сыныбы ашылып, мемориалдық тақта орнатылды, – деді №1 ЖББОМ директоры Жұмагүл Ахметова.

Қойшыбай Дәулеткәрімов – Қазақстан Республикасының Білім беру ісінің үздігі. Кезінде №1 Қаражал орта мектебінің директоры болған, қалалық білім бөлімін басқарған.

– Биыл біздің мектепте күрделі жөндеу жұмыстары жүргізілді. 60 жыл ішінде мұндай ауқымды жаңарту алғаш рет өтті. Бізде оқу үшін барлық қажетті жағдайлар жасалған, – деп атап өтті Жұмагүл Ахметова. – Мектеп 400-ден астам балаға білім береді.

Тәуелсіздіктің 30 жылдығына орай "Рухани жаңғыру" бағдарламасы аясында математика сыныбы мен өлкетану мұражайы ашылды. Бұл әр жылдардағы мектеп түлектерінің сыйы.