Астана күні қарсаңында Сәтбаев қаласының 12 тұрғынына пәтер кілттері табысталды

Сәтбаев қаласында Астана күні қарсаңында 12 адам пәтер кілттерін алды. Баспанаға ие болғандар санаттар бойынша мемлекеттік қордан үй алуға кезекте тұрған қала тұрғындары: көп балалы және толық емес отбасылар, жетім балалар, бюджеттік сала қызметкерлері, жалғыз тұрғын үйі апаттық деп танылған азаматтар болды.

Баспаналы болғандар қатарында «Мерей» балалар үйінің бұрынғы тәрбиеленушісі Анастасия Руснак бар. Ол сегіз жыл бойы баспана кезегінде тұрған.

– Мен жетім балаларға көрсетіліп жатқан қолдау үшін ризамын. Мен пәтер кілтін Астана күні қарсаңында алғаныма қуаныштымын. Менің арманым орындалды, – деп бөлісті қуанышымен Анастасия. – Әрбір отбасында осындай оқиға болғанын қалаймын.

Өз кезегінде Сәтбаев қаласының әкімі Асқар Ыдырысов пәтер кілтін алу баспана кезегінде тұрғандар үшін ең жағымды және қуанышты оқиғалардың бірі екенін атап өтті. Ол жаңа қоныстанушыларға амандық тілеп, оларды келе жатқан мерекелерімен құттықтады.