Қарағандылық кітапқұмарларды "Кітап оқитын қала" акциясына қатысуға шақырады

Жайық Бектұров атындағы Қарағанды облыстық жасөспірімдер кітапханасы 10 маусым күні барлық кітапқұмарларды "Кітап оқитын қала" акциясына шақырады. Іс-шара сағат 11:00-де басталады.

"Сіз қазақ әдебиетін қаншалықты жақсы білесіз?" атты викторина және кітаптарға шолу өтеді. Қатысушыларға "Мерейгер-жазушылар – 2021" буклеттері, бетбелгілер және басқа да кәдесыйлар таратылады. Әр адамға сыйлыққа кітап тарту етеді.

– Мұндай акция жаз мезгілінде айына бір рет өткізіледі, – дейді кітапхана жетекшісі Нұргүл Қаленова. - Биыл айына екі рет өткізетін шығармыз. Акциялар әдетте кітапхана алдында, Орталық саябақта өтеді. Бұл жолы алғаш рет облыстық балалар клиникалық ауруханасының алдында, субұрқақтың жанында өтеді. Акцияның негізгі мақсаты – жазда балалардың бос уақытын ұйымдастыру, балаларды кітап оқуға тарту және кітапхананы танымал ету.