Қарағандыда Мақат пен Ораз Рымжановтар туралы кітап жарық көрді
Қарағандыда "Мақат, Ораз Рымжановтар" кітабының тұсаукесері өтті. Оның кейіпкерлері - Қазақстанның еңбек сіңірген мәдениет қайраткері Мақат Рымжанов пен оның ұлы Ораз, белгілі режиссер, оператор және кинопродюсер.
– Мақат Рымжанов көрнекті адам болған, өз халқы үшін жаны ашитын. Ол ұлттық руханияттың сақталуына, өнер мен мәдениеттің өркендеуіне баға жетпес үлес қосты. Биыл оған 100 жыл толады, - деп атап өтті ҚР еңбек сіңірген әртісі және кітап құрастырушы Кеңес Жұмабеков. – Ал оның ұлы Ораз Мәскеу ГИТИС-ін бітіріп, еңбек жолын оператор ретінде бастады, содан кейін режиссер болды. Әкесі мен ұлы халықтың жадында мәңгі қалуы керек.
Ұлы Отан соғысының ардагері Мақат Рымжанов көп жылдар бойы Қарағанды облыстық мәдениет басқармасын басқарды. Ол сондай-ақ өзінің қоғамдық қызметімен танымал, Қарағанды қаласының Құрметті азаматы атағына ие болды.
Ораз Рымжанов кинематографистер одағын басқарды, 1998 жылы "Еуразия" I халықаралық кинофестивалін өткізуде бастамашылардың бірі болды.
– Біз өскелең ұрпаққа Мақат пен оның баласы туралы жанқиярлық және адал еңбектің үлгісін көрсетілгенін қалаймыз, – деді мәдениет, архивтер және құжаттама басқармасы басшысының орынбасары Еркебұлан Жұмақенов таныстыру рәсімінде.
Кітап Алматы қаласындағы "Үш қиян" баспасынан жарық көрді. Таралымы – 500 дана.
Тұсаукесер барысында "Сарыжайлау" кинотеатрында Мақат Рымжановтың Еңбек және өмір жолы туралы "Әкем" деректі фильмі көрсетілді. Картина түсірілімін оның ұлы Ораз 1999 жылы бастаған, бірақ режиссер қаза болғандықтан, ол ойлаған нәрсенің бәрі жүзеге асырылмады. Жылдар өткен соң, таспаны әріптестері, достары мен туыстары толықтырды.