«Бизнес және әзірлеу» неконференциясы: идеялар, технологиялар және пайдалы таныстық

31 шілде күні сағат 18:30-да Terricon Valley алаңында Қарағандының IT және Digital қауымдастығына арналған ең ірі іс-шаралардың бірі – «Бизнес және әзірлеу» атты тегін неконференция өтеді. Қатысушылар іс-шараға офлайн (Алалыкин көшесі, 12/1) немесе онлайн форматта қосыла алады.

Бағдарламада «Әзірлеу» және «Бизнес» атты екі параллель бағытқа бөлінген алты қысқа баяндама ұсынылады. Қатысушылар өздерін қызықтырған тақырыптарды таңдап, заманауи үрдістер туралы тың ақпарат алып, әріптестерімен тәжірибе алмасып, жаңа кәсіби байланыстар орната алады.

«Әзірлеу» бағыты аясында мамандардың IT саласына қалай сәтті ауысуға болатыны, мультиагентті жасанды интеллект жүйелерін әзірлеу кезінде командалар қандай қиындықтарға тап болатыны және 2026 жылы сұранысқа ие болып қалу үшін QA-инженерге қандай дағдылар қажет екені сөз болады.

Ал «Бизнес» бағыты ақпараттық шудың көптігі жағдайында өнімдерді ілгерілету, халықаралық байланыстардың бизнес пен технологияларды дамытудағы рөлі, сондай-ақ жеке брендтің кәсіпкерлерге клиенттер мен серіктестер тартуға қалай көмектесетініне арналмақ.

Баяндамалардан кейін қатысушыларды нетворкинг сессиясы мен кофе-брейк күтеді. Бұл – спикерлермен танысып, идеяларды талқылауға, байланыс алмасуға және пікірлес жандарды табуға тамаша мүмкіндік.

Іс-шараға қатысу тегін. Алдын ала тіркелу мына сілтеме арқылы жүзеге асырылады: terricon.kz.