Жаздың басты концерті: Теміртауда Металлург күніне 65 мың адам жиналды

Теміртауда Металлург күніне арналған мерекелік концертке шамамен 65 мың көрермен қатысты. Кеш барысында жанды музыка, жарық шоуы және танымал өнерпаздардың өнер көрсетуі көпшілікке көтеріңкі көңіл-күй сыйлады.

Сахнада M'Dee, Айқын, JazzDauren, Мирас Жүгінісов, Yenlik, «Ирина Кайратовна» және «Винтаж» топтары өнер көрсетті.

Әртістер бірін-бірі алмастырып, көрермендер әнге қосылып, би билеп, мерекелік сәттерді ұялы телефондарына түсіріп жатты.

Кештің ең жарқын сәттерінің бірі «Ирина Кайратовна» тобының өнер көрсетуі болды. Алғашқы әндерден-ақ сахна алдындағы алаң үлкен би алаңына айналды. Музыканттар көрермендермен белсенді байланыс орнатып, металлургтерді кәсіби мерекелерімен құттықтады.

— Теміртау! Металлург күні құтты болсын! Мықтылар қаласы! Бүгін – сіздердің кәсіби мерекелеріңіз. Аналар, әкелер – барлығы Qarmet компаниясында еңбек етеді, бүкіл қала осы кәсіпорынның арқасында дамып келеді! Баршаңызды құттықтаймыз! — деді топ мүшелері.

Концерттің қорытынды бөлімінде «Винтаж» тобы өнер көрсетті. Әнші Анна Плетнёва бастаған ұжымның танымал хиттерін көрермендер бірге орындады.

— Теміртау, сәлем! Металлург күні құтты болсын! Керемет қала, керемет тұрғындар! Мерекелеріңізбен! — деп Анна Плетнёва көрермендерге жылы лебізін білдірді.

Мерекелік кеш Теміртау аспанын түрлі түске бояған әсерлі отшашумен аяқталды.