Қарағандылық Кристина Овчинникова биікке секіру бойынша Қазақстанның ұлттық рейтингінде көш бастады
Қарағанды облысының жоғары спорт шеберлігі мектебінің өкілі Кристина Овчинникова халықаралық аренада айтарлықтай жетістікке жетті. Польшадағы беделді турнирдің қола медалі оған биікке секіру бойынша Қазақстанның ұлттық рейтингінде көш бастауға мүмкіндік берді.
Польшаның Белосток қаласында World Athletics Continental Tour Bronze сериясына кіретін Mityng Gwiazd na Rynku Kościuszki сегізінші халықаралық турнирі өтті. Әйелдер арасындағы биіктікке секіру жарысында қарағандылық спортшы 1,87 метр биіктікте планкадан өтіп, қола медальді жеңіп алды. Бұл нәтиже биылғы маусымда қазақстандық жеңіл атлеттер арасында үздік болды.
– Бұл жарыстар ерекше болды, өйткені олар қалалық алаңда өтті. Мен бұл туралы алдын ала білмеген едім. Рейстің кешігуіне байланысты дене қыздыруға үлгермедім, сосын маған: «Ертең дөңгелектің жанында секіресің», – деді. Бұл өте қызықты болды. Еуропада жарыстарда әрдайым көрермендер көп, бұл ерекше көңіл-күй тудырады. Өзіңнің жарысып қана қоймай, жұртшылық үшін де өнер көрсететініңді сезінесің. Сондықтан көрермендер алаңдатпады, керісінше, ынталандырды, – деді Кристина Овчинникова.
Белостоктағы турнир әлемдік жеңіл атлетиканың ең мықты өкілдерін жинады. Жарыс бес пән бойынша өтті: ерлер мен әйелдер арасында биікке секіру, сырықпен секіру, сондай-ақ ядро итеру. Чемпионатқа Қазақстан, Польша, Украина, Грекия, Франция, Португалия, Италия, АҚШ, Мексика, Түркия және Нигерия сияқты 13 елдің 35 спортшысы қатысты.
Биікке секіру секторында жеті спортшы өнер көрсетті. Кристина Овчинникова 1,96 метр нәтиже көрсеткен Париждегі Олимпиада ойындарының қола жүлдегері Ирина Геращенкоға (Украина) және 1,90 метр биіктікті бағындырған фин спортшысы Элла Юннилаға жол берді. Бұл ретте қарағандылық Франция, Түркия және Польша өкілдерінен озып кетті.
Таяу күндері қарағандылық жеңіл атлет Германия мен Польшада өтетін халықаралық жарыстарға қатысады. Содан кейін ол Қазақстанға оралып, ел чемпионатына қатысады. Спортшы үшін маусымның басты мақсаты алдағы Азия ойындарында табысты өнер көрсету болып қала береді.