Денсаулыққа пайдалы тағам: ҚарИУ-де жаңа буын инженер-технологтары даярланады
Қарағанды индустриялық университетінде «Тағам өнімдерінің технологиясы» атты жаңа білім беру бағдарламасы ашылды. Мұнда аспаздарды емес, заманауи әрі пайдалы азық-түлік өнімдерін әзірлей алатын инженер-технологтарды даярлайды.
Бұл туралы химия ғылымдарының кандидаты, профессор, химиялық технология және экология кафедрасының меңгерушісі Сәуле Кәбиева айтып берді. Оның сөзінше, жаңа бағдарлама университеттің фармацевтикалық технологиялар саласындағы жұмысының жалғасы саналады.
— Бүгінде тағам тек аштықты басатын құрал ғана емес. Ол иммунитетті нығайтып, адам денсаулығына пайдасын тигізуі керек, — дейді профессор. — Біз бұл бағдарламаны болашақтың сұранысын ескере отырып әзірледік.
Профессордың айтуынша, қазіргі таңда тағам өнеркәсібі фармацевтика саласымен тығыз байланысып келеді. Биологиялық белсенді қоспалар өндірісінде қолданылатын өсімдік экстрактілері, витаминдік кешендер мен минералды қоспалар бүгінде функционалды тағам өнімдерін шығаруда да кеңінен пайдаланылады.
Студенттер сүт, ет, нан-тоқаш және кондитерлік өнімдерді өндіру технологияларын, сондай-ақ өндірістік жабдықтарды, химиялық үдерістерді және сапаны талдау әдістерін меңгереді.
— Көпшілік бұл мамандықты аспаздықпен шатастырып жатады. Шын мәнінде, бұл — күрделі техникалық бағыт. Технолог — іс жүзінде инженер, — деп атап өтті профессор.
Мамандар даярлау үшін университетте қышқыл сүт және нан-тоқаш өнімдерінің технологиясына арналған заманауи зертхана ашылған. Ол термостаттармен, гомогенизаторлармен, микроскоптармен, pH-метрлермен және өзге де құрал-жабдықтармен қамтамасыз етілген.
Студенттер алғашқы өнімдерін де әзірлеп үлгерген. Олардың қатарында термостаттық айран, сүзбе қосылған қарақұмық тоқаштары, үй ірімшігі және табиғи экстрактілер қосылған сүт сарысуы негізіндегі сусындар бар.
Университетте алдағы уақытта өңір кәсіпорындарымен ынтымақтастық орнату, жаңа рецептуралар мен функционалды өнімдер әзірлеу, сондай-ақ болашақта өнімдерді өз брендімен шығару жоспарланып отыр.
Ғалымдар өндірістік аймақ тұрғындарының денсаулығына ерекше көңіл бөлуде. Сауле Кабиеваның айтуынша, зиянды еңбек жағдайында жұмыс істейтін адамдарға витаминдер мен антиоксиданттарға бай өнімдер аса қажет.
— Антиоксиданттар ағзаға токсиндер мен ауыр металдардың әсерімен күресуге көмектеседі, ал селен иммундық жүйені қолдайды, — дейді профессор.
Ғалымның пікірінше, жаңа білім беру бағдарламасы — ғылымды, технологияны және адам денсаулығына деген қамқорлықты тоғыстыруға жасалған қадам.
Қарағанды индустриялық университетінің баспасөз қызметінің ақпараты бойынша