Қарағандылық жасөспірім тағы да дронрейсингтен Қазақстанның чемпионы атанды

Қарағандылық 13 жастағы пилот Тимофей Муравьев Орал қаласында өткен Kazakhstan Drone Championship and Cup республикалық турнирінде үш бірдей дисциплина бойынша жеңіске жетіп, елдегі ең мықты дронрейсер мәртебесін тағы да растады. Жарысқа Астана мен Алматыда өткен іріктеу кезеңдерінен сүрінбей өткен Қазақстан мен Ресейден шамамен 50 пилот қатысты. 

Қарағанды намысын NSP KazGeoScan командасының екі мүшесі — Тимофей Муравьев пен Глеб Кайбазаков қорғады.

Чемпионат қорытындысы бойынша Тимофей DCL The Game симуляторында, сондай-ақ микродрондар және 5 дюймдік FPV-дрондар санатында үздік атанды.

DCL The Game симуляторы нақты дронды басқару жүйесін барынша дәл қайталайды және пилоттарды даярлауда кеңінен қолданылады.

— Әртүрлі симуляторлардың бірнеше түрі бар. DCL The Game — ең кең таралғандарының бірі. Жылдам ұшу өте қиын. Жақсы ұшу үшін жүздеген сағаттық жаттығу қажет. Тима осы симуляторда әлем бойынша 1-орын алған. Ол бұл жетістікке екі жыл бойы талмай еңбектеніп жетті, — деді пилоттың әкесі әрі команданың жаттықтырушысы Сергей Муравьев.

Оның командадағы серіктесі Глеб Кайбазаков та жоғары дайындық деңгейін көрсетіп, DCL The Game санатында төртінші орын иеленді.

— Бұл жай ғана жеңіс емес — бұл бүкіл ел үшін биік межені айқындайтын тұрақтылықтың, жылдамдықтың және пилоттау шеберлігінің көрсеткіші, — деп атап өтті Сергей Муравьев.