Кадрда және өмірде: Қарағандыда фотоэкспозиция мен иттер көрмесі біріктіріледі

Қарағанды тұрғындары мен қала қонақтарын ерекше форматта өтетін фотокөрмеге шақырады. Экспозиция иттер көрмесі қатар ұйымдастырылатын павильонда орналастырылады.

Көрмеге ұсынылған жұмыстардың авторлары — «Қарағанды» фотоклубының мүшелері.

— Біз, фотоклубтың негізін қалаушылар Тимур мен Светлана Кудериновтар, ұзақ уақыт бойы овчаркаларды бағып, олармен көрмелерге қатысып келдік. Иттеріміз жүлделі орындарға ие болатын. Қазір олар арамызда жоқ, алайда біз «Лидер ИТ» ит сүйер қауым клубымен байланысымызды үзген жоқпыз. Клуб өкілдері бізге жаңа, ерекше форматты сынап көруді ұсынды — иттер көрмесін фотокөрмемен біріктіру. Бұл шараны көрермендер үшін қызықты ете түседі деп ойлаймыз, — дейді Светлана Кудеринова.

Экспозицияда жануарлардың фотосуреттері ұсынылады — үй жануарлары, яғни мысықтар мен иттерден бастап, жабайы табиғат өкілдеріне дейін қамтылған.

Алдағы іс-шара қараша айына жоспарланған ірі республикалық иттер көрмесінің алдындағы сынақ кезеңі болмақ. Егер жаңа формат сәтті өтсе, оны алдағы уақытта да қолдану көзделіп отыр.

Көрмені 21 және 22 наурыз күндері тамашалауға болады. Ашылу салтанаты 21 наурыз күні сағат 12:00-де Бұқар жырау даңғылы, 80 мекенжайында өтеді.

Кіру барлық келушілер үшін тегін.