Қарағандыда қоғамдық-гуманитарлық бағыттағы ең үздік жобалар анықталды
Қарағандыда гуманитарлық бағыттағы ғылыми жобалар бойынша республикалық байқаудың финалы өтті. Қала алғаш рет 9–11-сынып оқушылары арасындағы республикалық ғылыми жобалар байқауының қорытынды кезеңін қабылдады.
Бұл – республикалық мектеп олимпиадасымен қатар еліміздегі зияткерлік сайыстардың ең маңыздысының бірі.
Байқауды жыл сайын ҚР Оқу-ағарту министрлігінің «Дарын» республикалық ғылыми-практикалық орталығы ұйымдастырады. Биыл облыс орталығына еліміздің барлық өңірлерінен оқушылар жиналды.
Қоғамдық-гуманитарлық циклдің тоғыз секциясының жұмысына 366 оқушы қатысып, этномәдениеттану, филология, тіл білімі, Қазақстан тарихы, құқықтану және басқа да жаратылыстану-гуманитарлық цикл пәндері бойынша 300-ге жуық жобаны ұсынды.
Байқаудың сәтті аяқталуымен қатысушыларды Қарағанды облысы білім басқармасының басшысы Дулат Жекебаев құттықтады. «Дарын» РҒПО директорының орынбасары Айгүл Қарақұлова жеңіс – мәреге жету емес, одан әрі дамудың жаңа кезеңі екенін атап өтті.
— Жеңімпаздарға айтарым, бұл – мәреге жеткен сәт емес, ғылыми жолдарыңыздың бастауы ғана. Бүгін медаль алмағандар үшін бұл келесі жолы мықтырақ өнер көрсетуге ынталандыратын серпін болуы тиіс. Ал бүгін сахнаға көтерілмегендер келесі жылы міндетті түрде осы жерде кездесуі керек. Сіздердің қолдарыңыздан бәрі келеді деп сенемін, — деді Айгүл Қарақұлова.
Қорғау нәтижесінде қатысушылардың 45 пайызы ҚР Оқу-ағарту министрлігінің I, II және III дәрежелі дипломдарымен, сондай-ақ алтын, күміс және қола медальдармен марапатталды. Жалпы 168 оқушыға жүлде табысталды, оның ішінде 30-ы алтын медаль иегері атанды.
Қарағанды қаласындағы Жамбыл Ақылбаев атындағы мектеп-гимназияның 10-сынып оқушысы Айғаным Демесінова «Қазақ тілі мен математика арасындағы байланыс: Фибоначчи сандары» тақырыбындағы жобасын ұсынып, қола жүлдегер атанды.
— Бұл тақырып маған жақын. Болашақта гуманитарлық бағытты таңдауды жоспарлап отырмын. Бұл – республикалық байқаудағы алғашқы медалім. Жобамды жетілдіріп, келесі жылы алтын алуға тырысамын, — деді жүлдегер.
Екібастұз қаласындағы №1 мамандандырылған мектеп-лицейдің 11-сынып оқушысы Регина Королёва алтын медаль жеңіп алды. Ол «Хабарлама авторының коммуникативтік ниеттерін білдіру тәсілі ретінде комментарийлер» тақырыбындағы орыс тілі бойынша жұмысын ұсынды. Жобамен бір жарым жыл бойы айналысқан.
— Мен Instagram әлеуметтік желісіндегі комментарийлерді талдап, пайдаланушылардың оларды қандай ниетпен қалдыратынын анықтадым. Бұл тақырып өзекті, себебі бүгінде көпшілік уақытын әлеуметтік желілерде өткізеді және әркімнің өз мақсаты бар — қолдаудан бастап сынға дейін. Бұл жоба болашақта маған қажет болатынына сенімдімін. Мүмкін, журналистика саласымен өмірімді байланыстырармын, — деді Регина.
Байқау жеңімпаздары жоғары оқу орындарына конкурссыз түсу құқығына және халықаралық ғылыми жарыстарға басымдықпен қатысу мүмкіндігіне ие болады.
Жаратылыстану-математикалық бағыттағы пәндер бойынша келесі кезең 24–27 ақпан аралығында Астанада өтеді. Оған 623 оқушы 463 жобамен қатысады.
Үздік жұмыстар 2026 жылғы мамыр айында АҚШ-тың Аризона штаты, Финикс қаласында өтетін Regeneron ISEF 2026 халықаралық көрмесіне қатысуға ұсынылады.