Мектептен мамандыққа дейін: «Кәусар» сарайы Қарағанды техникалық университетімен ынтымақтастық орнатты

Қарағанды қаласындағы «Кәусар» мектеп оқушылары сарайы Әбілқас Сағынов атындағы Қарағанды техникалық университетімен ынтымақтастық туралы меморандумға қол қойды. Құжат бірден екі міндетті шешуге бағытталған: оқушылардың ерте кәсіби бағдарын қалыптастыру және Сарайға білікті педагог кадрларды тарту.

Ынтымақтастық бастамашысы — мектеп оқушылары сарайының директоры Әйгерім Исбекова.

— Барлығы практикалық сұраныстан басталды. Бізге жоғары технологиялы кабинеттерге — робототехника, STEM-зертхана, заттар интернеті, VR-архитектура бағыттары бойынша педагогтер қажет болды. Егер LEGO базасындағы робототехника сабақтарын мектеп мұғалімдері жүргізе алса, Arduino және күрделірек инженерлік шешімдермен жұмыс істеу терең әрі арнайы білімді талап етеді. Сол кезде техникалық университетке жүгіну идеясы туды. Осылайша меморандумға да келдік, — дейді ол.

Келісім өзара тиімді ынтымақтастықты көздейді. «Кәусар» тәрбиеленушілері университетке барып, оның зертханалары мен технопарктерімен танысуға, білім беру бағдарламалары туралы ақпарат алуға және жоғары оқу орны мамандарынан кеңес алуға мүмкіндік алады. Бұл жасөспірімдерге болашақ мамандықты саналы түрде таңдауға және алған білімдерінің практикалық қолданылуын көруге жол ашады.

Өз кезегінде Қарағанды техникалық университетінің студенттері мектеп оқушылары сарайы базасында — STEM-зертханаларда, заттар интернеті кабинеттерінде және өзге де заманауи кеңістіктерде практикадан өте алады. Балалармен жұмыс істеу ұнаған студенттер үшін бұл тәжірибе алғашқы еңбек жолына айналуы мүмкін: түлектер Сарайда оқытушы ретінде қалу мүмкіндігіне ие болады.

Меморандум аясындағы алғашқы ресми іс-шара ақпан айына жоспарланған. Университет студенттері үшін «Кәусардың» кабинеттері бойынша экскурсия ұйымдастырылып, одан кейін жоғары оқу орны өкілдері Қазақстандағы цифрландыру және жасанды интеллектіні дамыту тақырыбында семинар өткізеді.

— Бұл — қарағандылық жоғары оқу орындарымен алғашқы ынтымақтастығымыз емес. 2025 жылы біз Е. А. Бөкетов атындағы Қарағанды университетінің ботаника кафедрасымен меморандумға қол қойдық. Қазіргі таңда Сарайда гидропоникалық жүйесі бар шағын бақ жұмыс істейді, онда оқушылар мен студенттер бірлескен жобалармен үлкен қызығушылықпен айналысуда, — деп атап өтті Әйгерім Исбекова.

Мұндай ынтымақтастық орта және жоғары білім арасындағы байланысты нығайтып, біртұтас білім беру кеңістігін қалыптастырады. 

Бұл өзара іс-қимыл мектеп оқушыларына мамандық таңдауға, ал студенттерге кәсіби даму траекториясын айқындауға мүмкіндік береді.