Қарағанды облысында әлеуметтік осал отбасылардың үйлеріне биыл 4500 өрт хабарлағышы орнатылды
Қарағанды облысында әлеуметтік осал санаттағы тұрғындардың үйлеріне өрт хабарлағыштарын орнату жұмыстары жалғасып жатыр.
Бұл құрылғылардың тиімділігі дәлелденді: жылыту маусымы басталғалы датчиктердің арқасында беске жуық көмірқышқыл газымен улану фактісінің алдын алуға мүмкіндік болды.
Республикалық өрт қауіпсіздігі профилактикалық айлығы аясында ТЖД қызметкерлері полициямен, жергілікті атқарушы органдармен, тұрғын үй инспекциясымен және еріктілермен бірлесіп, пешпен жылытылатын үйлерге қайта рейд жүргізуде.
Мақсат — пештердің жағдайын тексеру, бұзушылықтарды анықтау және қажет болған жағдайда оларды жоюға көмек көрсету.
— Біздің міндетіміз — әлеуметтік осал отбасыларды қамту. Бұл — көпбалалы отбасылар, жалғыз тұратын зейнеткерлер, мүгедектер және халықтың өзге де санаттары. Үйлерде көмірқышқыл газы датчиктері жоқ болса, біз оларды жергілікті бюджет есебінен орнатамыз, — деді Қарағанды облысы ТЖД Мемлекеттік өрт бақылау басқармасы бастығының орынбасары, азаматтық қорғау майоры Құрмет Жүмекенов. — Бұрын бұл үйлердің барлығы тексерілген, қазір бұзушылықтардың жойылғанына көз жеткізу үшін қайта оралып жатырмыз.
Курьяновка ауылындағы көпбалалы ана Мария Левен былтыр өрт хабарлағышын алып, оның қажеттілігіне көз жеткізген.
— Қыздарым тоқаш пісіріп жатқан, ол күйе бастады. Асүй датчик тұрған жерге жақын, сондықтан ол бірден іске қосылды. Барлығымыз үйде болдық, бұл шын өрт болмаса да, құрылғының қалай жұмыс істейтінін көрдік. Тіпті жеңіл күйік иісі шыққанда да датчик дабыл береді екен, — деді Мария. — ТЖД қызметкерлері жыл сайын келіп, пешті тексереді және кеңес береді. Олардың барлық ұсыныстарын орындаймыз, маусым басталар алдында міндетті түрде мұржаны тазалаймыз. Біздің қауіпсіздігіміз ең алдымен өзімізге байланысты.
Биыл облыста әлеуметтік осал санаттағы тұрғындардың үйлеріне шамамен 4500 өрт хабарлағышы орнатылды.
Қарағанды облысының ТЖД өңір тұрғындарын өрт қауіпсіздігі ережелерін сақтауға, тұрмыста жауапкершілік танытуға және төтенше жағдайлардың алдын алу үшін уақытылы шара қабылдауға шақырады.
