Алдағы жылдары Жезқазған, Сәтбаев және Ұлытау ауданында қандай өзгерістер болады

Жезқазған, Сәтбаев және Ұлытау ауданын алдағы жылдары не күтіп тұр? Олар қалай және қандай бағытта дамиды? Осы және басқа да мәселелерді Жезқазған өңіріне жұмыс сапары барысында Қарағанды облысының басшысы Жеңіс Қасымбек көтерді.

Кеңесте жергілікті әкімдер қалалар мен ауданның даму барысы туралы айтып берді.

Жезқазған басшысы Қайрат Әбсаттаров 2021 жылы 2 млрд теңгеге 35 ШОБ нысанын ашу жоспарланғанын хабарлады. 70 жұмыс орнын құру көзделуде. Бүгінгі таңда қала экономикасындағы ШОБ үлесі 16%-ды құрайды, 2021 жылға қарай оны 20%-ға дейін ұлғайту болжанып отыр.

Бұдан басқа, келесі жылы "KazGreenEnergy" ЖШС биоэлектростанциясының құрылысы" жобасын іске асыруға кіріседі. Станция бірегей "жасыл" технология бойынша жұмыс істейтін болады. Шикізат ретінде ҚТҚ полигонының қатты тұрмыстық қалдықтары пайдаланылуы тиіс.

Ұлытау ауданында туризмді дамытуға үлкен назар аударылуда. Жаңа нысандардың енгізілуімен келесі жылы 244 жұмыс орнын құру жоспарлануда. Ұлытау ауданының әкімі Берік Әбдіғалиұлының айтуынша, 2021 жылы қонақ үй, саумал-орталық, этноауыл, ат туризмін дамыту үшін ипподром салынады.

Биыл Сәтбаевтың дамуына Жұмыспен қамтудың жол картасы айтарлықтай септігін тигізді. Қалада 3 млрд теңгеге жуық сомаға 17 жоба іске асырылуда.

- Жолдар, гүлзарлар ретке келтіріліп, мектептер мен балабақшаларға жөндеу жұмыстары жүргізілді. Халықты, оның ішінде жастардың бос уақытын пайдалы өткізуін қамтамасыз ету мақсатында "Юность" стадионы (жеңіл атлетика орталығы ретінде) және жүзу бассейні сияқты спорттық нысандарды қайта жаңарту жоспарлануда, - деп хабарлады Сәтбаев қаласының әкімі Асқар Ыдырысов.

Жеңіс Қасымбек жастардың бос уақыты мен жұмыспен қамтылуына ерекше назар аударды.

- Сәтбаевта жастар көп - жұмыс орындарын құрып, 5-10 жылдан кейін не болатынын, қаланың даму әлеуеті туралы нақты түсінік беру маңызды. Сіздердің өңірдің дамуына көмектесетін баламалы салаларды іздеу керек, - деді облыс әкімі Асқар Ыдырысовқа. Сондай-ақ ол қаланы дамытудың нақты жоспарын ұсынуды тапсырды.

Кез келген әкімнің жұмыс индикаторларының бірі - жұмыс орындарын құру және өмір сүру үшін қолайлы орта жасау, деді Жеңіс Қасымбек жұмыс кеңесінің соңында. Жаңа жобаларды іске асыру үшін көп күш жұмсауды, қала құраушы компаниялардың жұмысына ғана емес, инвестициялар тартуды тапсырды.