Қарағанды облысында жылыту маусымы басталды

Қарағанды облысында биыл жылыту маусымы әдеттегіден ерте басталды. Бірінші болып жылу облыс орталығы және серіктес қалалар, сонымен қатар бірқатар ауылдық аудандарға беріледі. Осы аптаның соңында облыстың оңтүстігінде орналасқан аймақтарда жылу желілері толтырыла бастайды.

Жылу беру маусымының басталуы туралы ТКШ, энергетика және коммуналдық шаруашылық басқармасының басшысы Ұлантай Үсенов онлайн режимде өткен аппараттық кеңесте баяндады.

- ҚР Премьер-министрінің орынбасары Ералы Тоғжановтың тапсырмасына сәйкес, ЖРВИ және Covid-19 ауруларының өсуіне жол бермеу мақсатында және температураның күрт төмендеуіне байланысты 25 қыркүйектен бастап Қарағанды және Шахтинск қалаларында жылу беру маусымы басталды.  1 қазанға дейін облыс орталығында барлық үйлер мен мекемелер қосылады. 28 қыркүйектен бастап Теміртау, Саран, Абай, Бұқар Жырау, Қарқаралы, Нұра, Осакаров аудандарында жылу беріледі, - деп хабарлады ол.

Қазгидромет болжамына сәйкес, облыстың оңтүстігінде осы аптада жылы ауа райы сақталады – шамамен 18 градус нөлден жоғары. Балқаш, Жезқазған, Сәтпаев, Қаражал, Приозерск, Ақтоғай, Жаңаарқа, Шет және Ұлытау аудандарында жылыту маусымы 1-10 қазан аралығында басталады.

Жылыту маусымының басталуы штаттық режимде өтуде. Жылу көздерінде көмір мен мазуттың қоры жеткілікті.

Жергілікті көздерден жылытылатын әлеуметтік нысандар көмірмен қамтамасыз етілген. Бюджеттік ұйымдардың отынға жалпы қажеттілігі

189,2 мың тоннаны құрайды. Бүгінгі күні 174 мың тоннадан астам отын жеткізілді. Бұл жоспарланған көрсеткіштің 92,3% құрайды.