ҚР Парламенті Сенатының депутаттары Қарағанды облысында болып қайтты
Индустриялық аймақтың проблемалары мен жетістіктерімен жақынырақ танысу үшін Қарағанды облысына ҚР Парламенті Сенатының депутаттары келді. Қазіргі уақытта өңдеуші өндірісті дамытудың қағидаттарын, мақсаттары мен міндеттерін айқындайтын өнеркәсіптік саясат туралы заң жобасы әзірленуде.
Депутаттар «Сарыарқа» ЕЭА-да, бірқатар кәсіпорындарда болып, шағын және орта бизнес өкілдерімен кездесті.
Сенаторлар биылғы жылы ашылған Steel Manufacturing патрон зауытында болды. Жоспар бойынша жылына тапанша мен автоматтарға арналған 30 млн патрон өндіре алады.
- Қазір біз импорттық шикізатпен жұмыс істеп жатырмыз. Бірақ біздің мақсатымыз - қазақстандық өндіріс материалдарына барынша көшу. 2023 жылға қарай біз отандық шикізаттың 98%-ын пайдалануды жоспарлап отырмыз, - дейді зауыт директоры Бағлан Таненов.
Қазір «Steel Manufacturing» ЖШС-де 56 адам еңбек етеді. 2023 жылға қарай олардың саны 160-қа дейін артуы керек. Өндірістегі орташа жалақы – 200 мың теңге.
Бағдарламаның екінші бөлігі “Recycling Company" ЖШС-ға баруды көздеген болатын. Бұл Қазақстанда жарамсыз болып қалған автомобильдерді өңдейтін жалғыз кәсіпорын. Зауыттың өндірістік қуаты – жылына 50 мың машинаға дейін өңдеу. Бүгінгі таңда өңдеуге барлығы 134 159 автокөлік берілді. Оның ішінде 83 621 тонна қара металл сынықтары мен 3 508 тонна алюминий сынықтары алынды. Қайта өңдеу өнімдерін кәсіпорыннан “АрселорМиттал Теміртау" АҚ, "Кастинг" ЖШС және металдан бұйымдар жасайтын басқа да зауыттар сатып алады.
Депутаттар сондай-ақ YDD Corporation ферроқорытпа зауыты мен "Сарыарқа НАН" нан зауытының қызметімен танысты.
- Қазір өнеркәсіптік саясат туралы заң әзірленуде. Аймақтағы өнеркәсіптің проблемалары мен жетістіктерін білу үшін сенаторлар тобы келді. Бүгінгі таңда Қарағанды облысы - өңдеу өнеркәсібінің үлкен көлемі шоғырланған ең дамыған өңірлердің бірі. Тек 9 айдың ішінде өңірге 400 млрд-тан астам инвестиция салынды. Өндіріс көлемі 1,8 трлн теңгеден асты. Бұл өте жақсы көрсеткіш, - деді Парламент Сенатының депутаты Сүйіндік Алдашев.
Депутаттар сондай-ақ шағын және орта бизнес өкілдерімен кездесті. Олар кәсіпкерлердің карантин кезеңіндегі қолдау шаралары жөніндегі ұсыныстарын тыңдады. Олардың кейбіреулері карантин режимін сақтамағаны және қатаң санитарлық талаптар үшін салынған айыппұлдарға шағымданды.
- Біз қазір бизнес үшін ең оңай кезең емес екенін түсінеміз және кәсіпкерлерге барынша қолдау көрсетеміз. Шектеулер біртіндеп алынып тасталады, жекелеген санаттар үшін несиелер бойынша кейінге қалдырулар ұзартылады. Қазір жаңа салық заңнамасын әзірлеу жүріп жатыр және біз бизнесмендердің өздерінен оны барынша ыңғайлы етіп қалай жасау керектігі туралы пікір сұраймыз, - деп түсіндіреді Парламент Сенатының депутаты Еділ Мамытбеков.
Депутаттар сондай-ақ бизнестің қызмет көрсетуден қарапайым заттар өндірісі мен экономикасына өтуінің маңыздылығын атап өтті. Олардың бақылаулары бойынша, пандемия және шектеу шаралары қызмет көрсететін немесе импортталған тауарларды қайта сататын бизнес өкілдеріне қарағанда өндіріске анағұрлым аз әсер еткен.