Қарағанды облысында ұлттық спорт түрлерінің дамуына ерекше көңіл бөлінеді. Облыста 11 ұлттық спорт түрлері таралған (тоғызқұмалақ, саят, бәйге, жекпе-жек, қазақ күресі, асық ату, қыз қуу, теңге ілу, аударыспақ, көкпар, жамбы ату), шұғылданушылар саны 42 мыңнан астам адамды құрайды. Қазақстан Республикасының ұлттық құрамасы қатарына облыстың 18 спортшысы енген.
2019 жылы ұлттық спорт түрлерін қаржыландыру айтарлықтай ұлғайтылды. Басқарма бойынша 2018 жылы 13 млн. теңге бөлінсе, өткен жылы 38 млн. теңге бөлінді.
Қалалар мен аудандарда ұлттық спорт түрлерін дамыту үшін 42 млн. теңгеден астам қаржы бөлінді.
Бұл өз нәтижесін беруде. Мәселен, облыс спортшылары Ұлттық спорт түрлерінен жастар арасындағы I Азия Чемпионатында, "Қазақстан Барысы" республикалық турнирінде, аударыспақтан ересектер арасындағы ҚР Чемпионатында, тоғызқұмалақтан Халықаралық турнирде жеңімпаз және жүлдегер атанды.
Алғаш рет Қарағанды қаласында "Сарыарқа батырлары" I республикалық турнирі ұйымдастырылып, оған еліміздің 200-ден астам палуандары қатысты.
2019 жылдың жарқын және бұқаралық сипаттағы шарасы - Ботақара ауылында өткен ұлттық спорт түрлерінің Фестивалі болды. Оған қалалар мен аудандардан 200-ден астам спортшы қатысып, жарыс қорытындысы бойынша V республикалық Фестивальға қатысу үшін облыстың құрама командасы жасақталды. 13 спорт түрінен өткен жарыста қазақ күресі бойынша спортшылар 3-ші жалпыкомандалық орынды иеленсе, теңге ілу және тоғызқұмалақ бойынша 2 орындарға қол жеткізді.
Қараша айында Ақсу-Аюлы ауылында облысымызда алғаш рет саятшылықтан Сәкен Сейфуллиннің 125-жылдығына арналған «Ұлы дала мұрасы» Халықаралық турнирі өткізіліп, оған Моңғолия, Қырғызстан елдерінен және республикамыздың 13 облысынан 90-нан астам спортшы қатысты.
Моңғолияның Улан-Батыр қаласында қазақ күресінен өткен Азия Чемпионатында облыс спортшылары Тұтқышев Нариман мен Хуанбай Еламан алтыннан алқа тақса, Бекзат Ахметбеков күміс медальды олжалады.
Бұған қоса желтоқсан айында Ақтөбе қаласында өткен Әлем Чемпионатында жерлесіміз Ғалымов Айдос алтын медаль жеңіп алып, 74 кг. салмақ дәрежесінде Әлем Чемпионы атанды.
Түркияның Стамбул қаласында тоғызқұмалақтан өткен Халықаралық турнирде Қожанәсіп Аңсаған 1 орынға иеленсе, Қожанәсіп Асылхан түріктің "манқала" ойыны бойынша жеңімпаз атанды. Командалық есепте облыс құрамасы 1 орыннан көрінді.