16 сәуір күні Теміртау қаласындағы Жоғары политехникалық колледж базасында «Сенің таңдауың – сенің күшің: жастар және саясат» тақырыбында жастармен кездесу өтті
Іс-шараға Қарағанды облыстық аумақтық сайлау комиссиясының мүшелері — Абельгазина А.О. және Уатай Д.О., Қарағанды облысының Жас сайлаушылар клубының төрайымы — Қонысова А.Н., сондай-ақ Теміртау қаласының белсенді жастары қатысты.
Кездесу колледж студенттерін біріктіріп, азаматтық жауапкершілік пен қоғамдық өмірге қатысу мәселелерінің маңыздылығын кеңінен талқылауға мүмкіндік берді. Пікір алмасу барысында қатысушылар сайлау құқығының жай ғана формалдылық емес, ел дамуына ықпал ететін нақты құрал екеніне көз жеткізді.
Спикерлер қазіргі жастар — тек болашақ қана емес, бүгінгі күннің белсенді күші екенін атап өтіп, олардың қоғамдық үдерістерге ықпал ете алатынына ерекше назар аударды. Сонымен қатар, саналы таңдау жасау, сыни ойлау және әр азаматтың жеке ұстанымының маңыздылығы сөз болды.
Кездесу барысында жастардың сайлау үдерісіне қатысу мүмкіндіктері — волонтерлік қызметтен бастап сайлау комиссияларының жұмысына дейін кеңінен түсіндірілді. Сондай-ақ Жас сайлаушылар клубтарының қызметі жастардың азаматтық белсенділігін арттырудағы тиімді алаң ретінде таныстырылды.
Кездесу ашық әрі еркін форматта өтті: студенттер белсенді түрде пікір білдіріп, өздерін қызықтырған сұрақтарын қойып, қоғамдағы өз рөлі туралы ойларымен бөлісті.
Осындай кездесулер жастардың қоғамдық-саяси үдерістердегі өз орнын түсінуіне ықпал етіп, әрбір дауыстың маңыздылығын терең сезінуге мүмкіндік береді.
