15 сәуір күні Шахтинск қаласында «Сенің таңдауың – сенің күшің: жастар және саясат» тақырыбында жастармен кездесу өтті.
Іс-шараға Қарағанды облыстық аумақтық сайлау комиссиясының мүшелері — Абельгазина А.О. және Уатай Д.О., Қарағанды облысының Жас сайлаушылар клубының төрайымы — Қонысова А.Н., сондай-ақ Шахтинск қаласының Жас сайлаушылар клубының мүшелері қатысты.
Кездесуге Шахтинск қаласының мектеп оқушылары мен Шахтинск технологиялық колледжінің студенттері қатысып, бір алаңда белсенді әрі қызығушылығы жоғары жастардың басын қосты.
Ашық диалог барысында қатысушылар сайлау үдерісінің негізгі мәселелерін, сайлаудың қоғам өміріндегі маңызын, сондай-ақ жастардың ел болашағын қалыптастырудағы рөлін талқылады. Сонымен қатар, жас азаматтардың құқықтық мәдениетін арттыру және олардың азаматтық белсенділігін дамыту мәселелеріне ерекше назар аударылды.
Шахтинск қаласының Жас сайлаушылар клубының төрағасы қатысушыларды клубтың қызметімен таныстырып, жүзеге асырылып жатқан бастамалар мен жастарды қоғамдық өмірге тарту мүмкіндіктері туралы айтып өтті.
Кездесу еркін пікір алмасу форматында өтті: қатысушылар белсенді түрде сұрақтар қойып, өз ойларымен бөлісіп, сайлау тақырыбына деген жоғары қызығушылықтарын көрсетті.
Осындай кездесулер жастардың сайлау үдерісіне саналы көзқарасын қалыптастырып, олардың қоғамдық-саяси өмірдегі рөлін нығайтуға ықпал етеді.
