Қауіпсіздік – ел тыныштығының кепілі
Ахмет ауылында заманауи модульді жаңа өрт сөндіру бекеті салтанатты түрде ашылды. Бұл – ауыл халқының қауіпсіздігін күшейтіп, адам өмірін сақтауға бағытталған маңызды нысан.
Жаңа бекеттің іске қосылуы төтенше жағдай кезінде оқиға орнына жету уақытын қысқартып, авариялық-құтқару жұмыстарын жедел әрі тиімді жүргізуге мүмкіндік береді. Бұл – әрбір тұрғынның тыныштығы мен амандығына деген сенімді арттыратын нақты қадам.
Салтанатты шараға ҚР Төтенше жағдайлар министрі, генерал-лейтенант Шыңғыс Сайранұлы Әрінов, Нұра ауданының әкімі Мұқанов Бақытжан Мылтықбайұлы, аудандық сала басшылары, өрт сөндіру қызметінің мамандары мен ауыл ақсақалдары қатысты. Қазақы дәстүрге сай лента қиылып, әжелер шашу шашты. Ауыл ақсақалы Сүйініш Халымбай ақ батасын беріп, елге тыныштық, қызметке береке тіледі.
Іс-шара барысында жаңа өрт сөндіру бекетінің салынуына және іске қосылуына үлес қосқан азаматтар марапатталды. Төтенше жағдайлар министрінің Алғыс хатымен Нұра ауданы әкімінің орынбасары Есжанов Бахытжан Нұрхатұлы, Ахмет ауылының әкімі Теміров Дәулет Мерекеұлы марапатталды.
Сонымен қатар «Toyota Hilux» маркалы қызметтік автокөліктің кілті Нұра ауданының Төтенше жағдайлар бөлімінің бастығы, азаматтық қорғау подполковнигі Исаев Бекболат Ахатұлына салтанатты түрде табысталды.
Жаңа бекет «Ауыл құтқарушылары» бағдарламасы аясында заманауи өрт техникасы мен қажетті жарақтармен толық жабдықталды. Бұл – мемлекеттің ауыл қауіпсіздігіне деген тұрақты қолдауының айқын көрінісі.
Өрт сөндіру қызметі – ерлік пен жауапкершілікті талап ететін мамандық. Сондықтан бұл бекет – жай ғана ғимарат емес, бұл – адам өмірін қорғауға арналған сенімді қалқан.
Толығырақ «Нұра таңы» газетінің 07 ақпан күнгі №5 санынан оқи аласыздар.
Ахмет ауылында бұқаралық спортты дамытуға және тұрғындар арасында салауатты өмір салтын қалыптастыруға бағытталған жаңа спорт клубының салтанатты ашылуы өтті. Іс-шараға ауыл тұрғындары, ардагерлер, жастар, спортшылар және құрметті қонақтар қатысты. Жиында Нұра ауданының әкімі құттықтау сөз сөйлеп, тұрғындарды маңызды оқиғамен құттықтады. Ол Мемлекет басшысының тапсырмаларына сәйкес ауданда спортты дамыту және салауатты өмір салтын насихаттау бағытында жүйелі жұмыстар жүргізіліп жатқанын атап өтті. Жаңа спорт клубының ашылуы – атқарылып жатқан жұмыстың нақты нәтижесі әрі әсіресе жас ұрпаққа спортпен айналысуға қосымша мүмкіндік беретін маңызды нысан екені айтылды. Сонымен қатар, спорт клубын заманауи құрал-жабдықтармен қамтамасыз етуге үлес қосқан «Батыр боламын» қоғамдық қорына алғыс білдірілді. Аталған жобаның жүзеге асырылуы жастардың денсаулығы мен болашағына салынған маңызды инвестиция екені ерекше атап өтілді. Іс-шара барысында қатысушыларға спорт клубының ішкі инфрақұрылымы таныстырылып, бокс, жекпе-жек және күрес түрлері бойынша көрсетілім жаттығулары ұйымдастырылды. Қонақтар спорт нысанының материалдық-техникалық базасымен және жаттықтырушылар құрамымен де танысты. Жаңа спорт клубы алдағы уақытта Ахмет ауылы жастары үшін маңызды орталыққа айналып, тәртіпті, мақсатшыл және дене шынықтыруы жоғары азаматтарды тәрбиелеуге, сондай-ақ аудан мен ел намысын түрлі деңгейде қорғайтын болашақ спортшыларды даярлауға ықпал етеді деп күтілуде.