Қарағанды облысында негізгі туристік орталықтар айқындалып, Балқаш курорттық аймағы және Қарқаралы курорттық аймағы, Қарағанды қаласы іскерлік және оқиғалық туризмнің орталығы ретінде белгіленді.

Келешекте табиғи ресурстарға бай Приозерск қаласында, Абай, Бұқар жырау, Осакаров, Нұра және Ақтоғай аудандарында жаңа өсу нүктелерін дамыту көзделуде.

Бірінші кезектегі міндет – әрі қарайғы құрылысты қамтамасыз ету үшін инфрақұрылымды жетілдіру, туристердің жайлы болуына жағдай жасау және өңірдің инвестициялық тартымдылығын арттыру.

Балқаш курорттық аймағында инженерлік коммуникациялардың құрылысы басталды. Балқаш-Тораңғалық магистральдық су құбырын салу, сондай-ақ  Балқаш қаласының жағалау аймағы мен қалалық жағажайын абаттандыру жұмыстары жүргізілуде.

Балқаш қаласындағы «Бертіс» шығанағы ауданында инженерлік-коммуникациялық инфрақұрылым құрылысы аяқталды. Осы аумақта «Сарыарқа» ӘКК» АҚ бизнес өкілдерімен бірлесіп «4» жұлдыз санатындағы қонақүйлер салу бойынша 2 жобаны іске асыруда.

2025 жылы Балқаш қаласының әуежайын реконструкциялау және арнайы көлік қызметі ғимаратының құрылысы (сыртқы инженерлік желілерсіз) аяқталды.

Қарқаралы қаласында «Жарлы-Қарқаралы» су құбырының құрылыс-монтаж жұмыстары аяқталды (38 км. су құбыры желілері тартылып, 4 сорғы станциясы және 2 резервуар орнатылды). Қарқаралы ауданының «Бұғылы» рекреациялық аймағында сумен жабдықтау, су бұру, электр желісі және байланыс жүйесінің құрылысы басталды.

2025 жылдың қаңтар-қыркүйек айларының қорытындысы бойынша туризмнің негізгі көрсеткіштері бойынша оң динамика байқалады.

Орналастыру орындарының саны 2,6% - ға артып, 279 бірлікті құрады. Орналастыру орындары көрсеткен қызметтер көлемі 2,6%-ға өсіп, 8,0 млрд. теңгені құрады. Бір мезгілдегі сыйымдылық 14 804 төсек - орынды құрап, 2024 жылдың сәйкес кезеңімен салыстырғанда 103,2%-ды көрсетті.

Қызмет көрсетілген келушілердің жалпы саны 370 мың адамды құрады, бұл өткен жылдың сәйкес кезеңімен салыстырғанда 20,8% - ға жоғары.

2025 жылғы қаңтар-қарашаның қорытындысы бойынша туризм саласындағы негізгі капиталға инвестициялар көлемі 23,5 млрд теңгені құрады, НКИ 2024 жылдың ұқсас кезеңімен салыстырғанда 122,6%.