Қарқаралы ауданының Көктас ауылында жаңа дене шынықтыру-сауықтыру кешені ашылды
Қарқаралы ауданының Көктас ауылында Республика күні қарсаңында жалпы ауданы 542 шаршы метр болатын жаңа дене шынықтыру-сауықтыру кешені ашылды.
Ашылу салтанатына аудан әкімі Саят Мусин мен облыстық дене шынықтыру және спорт басқармасының басшысы Нүркен Нұратов қатысты. Шара барысында бұқаралық спортты дамытуға қосқан үлесі үшін ардагер-спортшы Жұмаш Құрманғалиев аудан әкімінің Алғыс хатымен марапатталды.
«Нұрай Құрылыс Сервис» ЖШС салған жаңа екі қабатты кешенде спорт залы, әкімшілік бөлме және душ кабиналары қарастырылған. Нысан ауыл тұрғындары мен жастар арасында бұқаралық спортты дамытуға және салауатты өмір салтын қалыптастыруға бағытталған.
“BAIQYMYZ” аймақаралық гастрономиялық фестивалі
Қарқаралыда өтетін “BaiQymyz” гастрофестивалі — қазақ даласының дәстүрін, ұлттық дәмін және мәдениетін тоғыстыратын ерекше шара.
Фестиваль барысында шеберлер жылқы тақырыбына арналған туындыларын ұсынады. Бұл — дала мәдениетінің, еркіндік пен тектіліктің символы.
Сондай-ақ көрмеде көшпелі халықтардың тарихы, салт-дәстүрі мен мәдени ерекшеліктері өнер және қолөнер арқылы насихатталады.
Мереке аясында өнер ұжымдарының қатысуымен қазақтың дәстүрлі және эстрадалық әндері орындалады.
Баршаңызды ұлттық рухты дәріптейтін мазмұнды мерекеге шақырамыз!
ОБЛЫСТЫҚ VI АУЫЛ ЖАСӨСПІРІМДЕР СПАРТАКИАДАСЫНЫҢ АШЫЛУЫ ӨТТІ
Қарқаралы қаласында ауыл жасөспірімдерінің облыстық VI жазғы спартакиадасының салтанатты ашылуы өтті. Дүбірлі додаға Қарағанды облысының аудандарынан 500-ге жуық жас спортшы қатысуда.
Спартакиада аясында спорттың 9 түрінен жарыстар ұйымдастырылып, сайыстар 12-13 мамыр күндері өтеді.
Салтанатты шарада аудан әкімінің орынбасары мен облыстық спорт басқармасының басшысы құттықтау сөз сөйлеп, жас спортшыларға сәттілік тіледі. Ардагер спортшы Дүйсентай ата ақ батасын берді.
Шара барысында аудан спортының дамуына үлес қосқан ардагер жаттықтырушылар Бүркіт Бейсенаев пен Тұрсын Жұмағұлов «Спортқа еңбек сіңіргені үшін» төсбелгісімен марапатталды.
Спартакиада концерттік бағдарламамен жалғасып, көтеріңкі көңіл-күй сыйлады.
«БОЛАШАҚҚА ЖОЛДАМА» VII аудандық кәсіптік бағдар беру форумы
Қарқаралы қаласының Ш.Жандарбекова атындағы мәдениет орталығында «БОЛАШАҚҚА ЖОЛДАМА» VII аудандық кәсіптік бағдар беру форумы өтті.
Шараның басты мақсаты – оқушыларға мамандық таңдауда дұрыс бағыт-бағдар беру және еңбек нарығында сұранысқа ие кәсіптермен таныстыру.
Форумға 4 жоғары оқу орны мен 4 колледж қатысты. Атап айтқанда:
Академик Е. А. Бөкетов атындағы Қарағанды ұлттық зерттеу университеті, Ә. Сағынов атындағы Қарағанды техникалық университеті, Қазтұтынуодағы Қарағанды экономикалық университеті, «Болашақ» академиясы, сондай-ақ Қарқаралы қаласының М. Әдекенов атындағы ауылшаруашылық колледжі, Қарағанды экономика, бизнес және құқық колледжі, Қарағанды жоғары гуманитарлық колледжі және Қарағанды теміржол колледжі.
Форумға ауданның білім беру ұйымдарынан 9–11 сынып оқушылары, ата-аналар және ұстаздар қатысты. Іс-шара барысында оқушылар өздерін қызықтырған мамандықтар бойынша сұрақтар қойып, нақты жауаптар алды.
Өңірлік коммуникациялар қызметі алаңында аудан әкімінің міндетін атқарушы Саят Мусиннің қатысуымен Қарағанды облысы Қарқаралы ауданының 2025 жылғы әлеуметтік-экономикалық даму қорытындылары бойынша брифинг өтті. Брифинг барысында ауданның өнеркәсіп, ауыл шаруашылығы, инвестиция тарту, туризм, шағын және орта бизнес, жұмыспен қамту, әлеуметтік қолдау, инфрақұрылым, тұрғын үй құрылысы, білім беру, денсаулық сақтау, спорт, мәдениет, жол жөндеу және интернет байланысын дамыту салаларындағы атқарылған жұмыстар мен қол жеткізілген нәтижелер таныстырылды. Сондай-ақ 2026 жылға арналған инвестициялық жобалар, әлеуметтік бастамалар және инфрақұрылымды жаңғырту жоспарлары баяндалды.
Ауған соғысы ардагерлеріне құрмет көрсетілді
Ауған соғысы ардагерлерінің күніне орай, бүгін бірқатар мерекелік іс-шаралар өтті.
Алдымен аудан әкімінің міндетін атқарушы Саят Қабиденұлы ардагерлермен кездесіп, мерекелерімен құттықтап, ізгі тілегін білдірді.
Одан кейін орталық саябақтағы Ауған соғысында қаза тапқан жерлес сарбаздарға арналған ескерткішке гүл шоқтарын қойып, Жамалиден Әлібаев, Асқар Быхин, Нағашыбай Жақтыбаев, Өміртай Құлтабаровтың рухтарына тағзым жасау рәсімі өтті.
Шара аудандық тарихи-өлкетану музейінде өткен дөңгелек үстелде жалғасын тапты.
Аудандық қоғамдық кеңестің төрағасы Сайлау Әлиұлы, аудандық ардагерлер кеңесінің төрағасы Ойрат Жүкібаев, Нағашыбай Жақтыбаевтың жұбайы Татьяна Түсіпқызы, ауған соғысының ардагерлері Серік Жұмабеков, Нұрлан Әубәкіров, Шаймұрат Жұмаділовтер сөз сөйлеп, патриоттық тәрбие, отансүйгіштік рух, отанға адал қызмет етуге қатысты ой-пікірлерімен бөлісті.
Мәнді сұхбат әсем әнмен әрленіп, Өнер мектебінің тәлімгері Айтолқын Шаймерденова өз өнерін тарту етті.
ҚАРҚАРАЛЫДА ШАҢҒЫДАН V АШЫҚ МАРАФОН ӨТТІ
Демалыс күні Қарқаралы қаласындағы шаңғы базасында шаңғымен жүгіруден V ашық Қарқаралы марафоны өтті.
Мемлекет саясатының басым бағыттарының бірі – халық арасында салауатты өмір салтын қалыптастыру, өскелең ұрпақты тәрбиелеу, жастарды спортқа баулу және бұқаралық спортты дамыту болып табылады. Осы мақсатта ұйымдастырылған дәстүрлі марафон табиғаты көркем, туристік әлеуеті жоғары Қарқаралы қаласында жоғары деңгейде өтті.
Ашық марафонға Астана, Көкшетау, Павлодар, Қарағанды қалаларынан және аудан өңірлерінен 50-ге жуық спортшы қатысты.
Жарыс қашықтықтары келесідей болды:
– оқушы қыздар – 5 шақырым;
– оқушы ұлдар – 10 шақырым;
– ересек әйелдер – 15 шақырым;
– ерлер – 30 шақырым.
Марафонның жалпы жүлде қоры 500 мың теңгені құрады. Сонымен қатар, V ашық марафонға арнайы эскизбен жасалған медальдар табысталды. Медаль дайындауға демеушілік көрсеткен жергілікті кәсіпкерлер – өңір спортына тұрақты қолдау білдіріп жүрген азаматтар Айдос Жазитұлына, Жақсылық Қайырбекұлына, Жарылқасын Несіпханұлына ерекше алғыс білдіреміз.
Сондай-ақ, аталған марафонды ұйымдастыруға бастамашы болып, жыл сайын өткізілуіне тікелей атсалысып келе жатқан белгілі спортшы, марафоншы Думан Бейсенаевтың еңбегін ерекше атап өткен жөн.
Жеңімпаздарға сүт және тағам өнімдерімен демеушілік көрсеткен отандық «NATIGE» сүт фабрикасының басшылығына да алғысымызды білдіреміз.
Жарыс қорытындысы бойынша жеңімпаздар арнайы жасалған медальдармен, бағалы сыйлықтармен және ақшалай сыйақымен марапатталды.
Іс-шараға қала тұрғындары мен спортшылар отбасыларымен келіп, қатысушыларға қолдау көрсетті. Патриоттық әндер шырқалып, марафон жоғары көңіл-күйде өтіп, көрермендер мен спортшыларға мерекелік әсер сыйлады.
Атқарылған жұмыстар мен алдағы міндеттер талқыланды
Бүгін аудандық қоғамдық кеңестің кезекті отырысы өтті. Жиынға аудан басшылығы, кеңес мүшелері, дербес бөлім, мекеме басшылары, аудандық мәслихат, ардагерлер кеңесі, қала, кент, ауылдық округ әкімдері қатысты.
Аудан әкімінің міндетін атқарушы Саят Қабиденұлы өткен жылғы атқарылған жұмыстар мен алдағы жоспарлар туралы баяндама жасап, жан-жақты мағлұмат берді.
Қоғамдық кеңес төрағасы Сайлау Әлиұлы, кеңес мүшелері Серік Жекейұлы және Мұрат Тәңірбергенұлы ауданның өзекті мәселелері туралы өз ой-пікірлерін ортаға салды. Көтерілген сұрақ-сауалдарға тиянақты жауаптар берілді.
Жалпы кеңес мүшелері аудан басшылығының атқарылып жатқан жұмыстар мен белгіленіп отырған міндеттер турасындағы толымды ақпаратына ризашылығын білдіріп, алда бірлесе атқаратын жұмыстарға сәттілік тіледі.
ҚАРҚАРАЛЫДА «ROBOLAND – 2026» АУДАНДЫҚ ІРІКТЕУ КЕЗЕҢІ ӨТТІ
Қарқаралы ауданының білім бөлімінің ұйымдастыруымен Ә. Ермеков атындағы мектепте «ROBOLAND – 2026» XI Халықаралық фестиваль-байқауының аудандық іріктеу кезеңі өтті.
Аталған шараға Қарқаралы ауданының білім беру ұйымдарынан, атап айтқанда Қарқаралы ауданының балалар мен жасөспірімдер шығармашылық орталығының, Қарқаралы қаласының академик О. Жәутіков атындағы №1 орта мектептің, Мәди Бапиұлы атындағы №44 орта мектептің, сондай-ақ Ынталы ауылының №3, Тегісшілдік ауылының №6, Нүркен ауылының №10, Талды ауылының №19, Айнабұлақ ауылының №31 және Қоянды ауылының №35 орта мектептерінен 10–14 жас аралығындағы оқушылардан құралған командалар қатысты.
Аудандық іріктеу кезеңі «Садақ ату», «Кегльринг квадро», «Лабиринт», «Мини-футбол (басқарылатын роботтар)», «Полоса препятствий» бағыттары бойынша өткізілді.
Жалпыкомандалық есеп нәтижесі бойынша:
• I орынды – Қарқаралы ауданының балалар мен жасөспірімдер шығармашылық орталығының құрама командасы;
• II орынды – Қарқаралы қаласының №1 академик О. Жәутіков атындағы мектептің құрама командасы;
• III орынды – Жарлы ауылының №10 Нүркен Әбдіров атындағы мектептің құрама командасы иеленді.
Жүлделі орын алған командалар «ROBOLAND – 2026» фестиваль-байқауының облыстық кезеңіне жолдама алды.
ТӘУЕЛСІЗДІК – ҚАСТЕРЛІ ҚҰНДЫЛЫҚ!
Қазақстан Республикасы Тәуелсіздігі күніне орай Қарқаралы тарихи-өлкетану музейінде «Тәуелсіздік – елдігіміздің басты құндылығы» тақырыбында дөңгелек үстел ұйымдастырылды.
Іс-шараның негізгі мақсаты – Тәуелсіздіктің тарихи маңызын дәріптеу, ұлттық бірегейлікті нығайту және жастар арасында отансүйгіштік құндылықтарды қалыптастыру.
Шараға Желтоқсан оқиғасының қатысушылары Нүркенов Сләмиден Қамашұлы, Омарбеков Мақсат Мақсымұлы, Хамитов Тишбек Төлеуханұлы арнайы шақырылды. Сондай-ақ, аудан әкімінің орынбасары Ілияш Нұржан Ағыбайұлы, аудандық ардагерлер кеңесінің төрағасы Жүкібаев Ойрат Ыбырайымханұлы және аудан жастары қатысты.
Дөңгелек үстел барысында Нұржан Ағыбайұлы мен Желтоқсан оқиғасының куәгері Сләмиден Қамашұлы сөз сөйлеп, ұлт тарихында айрықша орын алатын 1986 жылғы Желтоқсан оқиғасының маңызы туралы өз ой-пікірлерімен бөлісті.
Сонымен қатар, Егіндібұлақ ауылының тұрғыны, ардагер ұстаз Мұхит Қапсаттарұлы, аудандық архив басшысы Манарбек Әзімбекұлы, аудандық қазынашылық басқармасының басшысы Мұрат Тәңірбергенұлы, ардагер журналист, «Абыз» театрының режиссері Бану Даутанқызы сөз сөйлеп, жастардың ел болашағындағы рөлі, тәуелсіздікті сақтау жолындағы жауапкершілігі жөнінде мазмұнды ой қозғады.
Шара жастардың тарихи санасын қалыптастырып, өткеннен тағылым алуға, ел тәуелсіздігін қадірлеуге бағытталған мағыналы кездесуге айналды.
Іс-шара қорытындысында қатысушылар Тәуелсіздікті сақтау мен нығайту – әрбір азаматтың ортақ міндеті екенін атап өтті.