Қарқаралы қаласының спорт кешенінде Жастар, спорт, білім және әлеуметтік бағдарламалар бөлімінің ұйымдастыруымен Мүмкіндігі шектеулі жандар күніне орай ерекше балаларға арналған «Көңілді мәрe» сайысы өтті.
Аталған сайысқа 9 отбасы қатысып, шеңберге доп салу, доп лақтыру, қысқа қашықтыққа жүгіру және сурет салу бойынша бақ сынады.
Іс-шараның соңында сайысқа қатысқан барлық балаға естелік сыйлықтар табысталды.
Қарқаралыда аудандық ветеринариялық станция мен зертхананың жаңа ғимараты ашылды
25 қыркүйек күні Қарқаралы қаласында аудандық ветеринариялық станция мен ветеринариялық зертхананың жаңа ғимаратының ашылу салтанаты өтті.
Салтанатты шараға Қарқаралы ауданының әкімі Саят Мусин, ҚР Ауыл шаруашылығы министрлігі Ветеринариялық бақылау және қадағалау комитеті Республикалық ветеринариялық зертханасының бас директоры Темірхан Елшібаев және сала мамандары қатысты.
Жаңа зертхана заманауи талаптарға сай жабдықталып, жануарлардың аса қауіпті ауруларын зерттеу, ветеринариялық-санитариялық сараптама жүргізу және қауіпсіздігі талапқа сай келмейтін өнімдерді анықтау бағытында қызмет атқарады.
Шара барысында қонақтар сынама қабылдау, серология және ветеринариялық-санитариялық сараптау кабинеттерінің жұмысымен танысты.
Қарқаралы қаласының Ш.Жандарбекова атындағы мәдениет орталығында «БОЛАШАҚҚА ЖОЛДАМА» VII аудандық кәсіптік бағдар беру форумы өтті.
Шараның басты мақсаты – оқушыларға мамандық таңдауда дұрыс бағыт-бағдар беру және еңбек нарығында сұранысқа ие кәсіптермен таныстыру.
Форумға 4 жоғары оқу орны мен 4 колледж қатысты. Атап айтқанда:
Академик Е. А. Бөкетов атындағы Қарағанды ұлттық зерттеу университеті, Ә. Сағынов атындағы Қарағанды техникалық университеті, Қазтұтынуодағы Қарағанды экономикалық университеті, «Болашақ» академиясы, сондай-ақ Қарқаралы қаласының М. Әдекенов атындағы ауылшаруашылық колледжі, Қарағанды экономика, бизнес және құқық колледжі, Қарағанды жоғары гуманитарлық колледжі және Қарағанды теміржол колледжі.
Форумға ауданның білім беру ұйымдарынан 9–11 сынып оқушылары, ата-аналар және ұстаздар қатысты. Іс-шара барысында оқушылар өздерін қызықтырған мамандықтар бойынша сұрақтар қойып, нақты жауаптар алды.
Қарқаралылықтар «Таза Қазақстан» акциясы аясындағы жұмыстарды жалғастыруда.
Бүгін көктемгі тазалық, көгалдандыру жұмыстары барысында қазақтың тұңғыш ғарышкері, батыр жерлесіміз Тоқтар Әубәкіровтің 80 жылдық мерейтойына орай, Қарқаралы қаласындағы батыр атындағы көше бойында 100 түп қарағай ағашы отырғызылды.
Шара басталмас бұрын, аудан әкімінің міндетін атқарушы Саят Қабиденұлы бұл акцияның мән-маңызына ерекше тоқталып, жерлестерді «Таза Қазақстан» акциясын бірлесе ұйымшылдықпен қолдауға шақырды және алдағы уақытта қала ішіне жасыл көшеттерді егу жұмыстары жалғасатынын атап өтті.
Денешынықтыру жаттығуларымен бой сергітіп алған қарқаралылықтар жұмысқа құлшына кірісіп, ұйымшылдықпен атқарып өтті.
Қала басындағы мекемелер мен ұйымдар, депутаттар мен қоғамдастық өкілдері, ардагерлер мен ерікті жастар, жас отбасылар бірлесіп, іске асқан бірегей шара «Таза Қазақстан» акциясын қолдауға бағытталып, биыл 80 жасқа толатын Тоқтар Оңғарбайұлына деген игі тілекпен іске асты.
Тұрғын үй көмегі – бұл Қазақстандағы аз қамтылған азаматтар мен отбасыларға арналған мемлекеттік төлем. Оның негізгі мақсаты - тұрғын үй, коммуналдық қызметтер және мемлекеттік тұрғын үй қорынан алынған тұрғын үйді жалға алу шығындарының бір бөлігін өтеу.
Мемлекеттік әлеуметтік осал азаматтарды қолдауға тырысады және цифрландыру арқылы процесстің ашықтығын қамтамасыз етеді.
Өтініш беру процессі мүмкіндігінше жеңіл әрі қолжетімді: egov.kz. порталында электронды өтінім беру мүмкіндігі қарастырылған. Бұл ретте өтініш беруші және оның отбасы туралы негізгі мәліметтер (жылжымайтын мүліктің болуы, тұрақты тіркелуі, кірістері, банк шоты) мемлекеттік органдарға сұрау салу арқылы тексеріледі. Кірістер туралы мәліметтер ақпараттық жүйелер арқылы тексеріледі. Өтінімді тіркеу үшін кәмелетке толған отбасы мүшелерінен келісім алу қажет.
Тұрғын үй көмегін қалай алуға болады:
Тұрғын үй көмегі аз қамтылған азаматтарға және жиынтық табысы төмен, ал тұрғын үйге, коммуналдық қызметтерге және тұрғын үйді жалға алуға арналған шығыстар (егер ол мемлекеттік тұрғын үй қорынан алынған болса) Қарқаралы ауданы бойынша белгіленген 4 % шекті деңгейден отбасының жиынтық табысы асатын отбасыларға көрсетіледі.
Тұрғын үй көмегін өздерінің жалғыз баспаналарында тұратын немесе мемлекеттік тұрғын үй қорынан жалға алған азаматтар ала алады.
Аз қамтылғандарға кімдер жатады? Мәслихат белгілеген шекті жол берілетін шығыстардың үлесі (отбасының жиынтық табысының 4 %) тұрғын үйге, коммуналдық қызметтерге және тұрғын үйді жалға алуға (мемлекеттік қор) нақты шығыстардан төмен бір тұрғын үйде тұратын отбасы аз қамтылған болып есептеледі.
Көмек алудың негізгі шарттары:
1. Тіркелу және тұру: көмек тек тұрақты тіркелу орны және нақы тұру фактісі бойынша беріледі.
2. Жалғыз баспана: көмек тек жалғыз бір тұрғын үйге беріледі. Азаматтар өздерінің жалғыз баспаналарында тұруы немесе оны мемлекеттік тұрғын үй қорынан жалға алуы қажет.
3. Табыстарды есепке алу: Отбасының табысы өтініш берген тоқсанның алдындағы тоқсан үшін есептеледі. Тұрғын үй көмегін көрсету қағидаларында көрсетілгендерді қоспағанда (Қазақстан Республикасы Өнеркәсіп және құрылыс министрінің 2023 жылғы 8 желтоқсандағы № 117 бұйрығы), табыстың барлық түрлері есептеледі: жалақы, жәрдемақы, алимент, бизнестегі табыс, жалға алу, құнды қағаздар, сыйға беру және т.б.
4. Тағайындау кезеңі: Тұрғын үй көмегі тоқсанға (3 айға) тағайындалады. Осы кезеңнен кейін қайта өтініш беру және кірістер мен шығыстарды растау қажет.
Коммуналдық қызметтер кімге өтеледі? Тағайындаудың жаңа нормалары мен тәртібі
Тұрғын үй көмегі аз қамтылған азаматтарға шығыстардың бір бөлігін мынадай санаттар бойынша өтейді:
коммуналдық қызметтер: су, жарық, жылу;
тұрғын үйді және үй маңындағы аумақты күтіп ұстау; күрделі жөндеу;
байланыс қызметтері (мысалы, телефон үшін абоненттік төлем); мемлекеттік тұрғын үй қорынан алынған тұрғын үй үшін жалдау ақысы. Білу маңызды:
✓ көмек тек бір тұрғын үйге беріледі;
✓ көмекжекетұлғадантұрғынүйдіжалғаалушығындарына
қолданылмайды;
✓ көмек коммуналдық қызметтерді шамадан тыс тұтынуды қамтымайды;
✓ көмек тұрғын үй алаңының белгіленген нормаларынан асатын тұтынуды
қамтымайды;
✓ табыс жасырылған кезде көмек жойылуы мүмкін және қайтаруды талап етуі мүмкін.
Тұрғын үй көмегін қалай есептейді: жалғыз тұратын адамға отыз шаршы метрден аспайтын бірыңғай лимиттер және 18 шаршы метр.
Есептеу формуласы:
Тұрғын үй көмегі = Нақты шығыстар (коммуналдық төлемдерге, тұрғын үйді күтіп ұстауға, күрделі жөндеу жұмыстары, жалға алуды төлеу) – Шығыстардың шекті рұқсат етілген деңгейі.
Шығыстардың шекті рұқсат етілген деңгейі отбасының жиынтық табысының пайызын білдіреді, одан жоғары тұрғын үй шығындары өтелуі мүмкін.
Бұл пайыздың мөлшерін жергілікті мәслихаттар белгілейді. Бұл отбасының жиынтық табысының 4 % тең.
Тұрғын үй көмегі: 15 минут ішінде онлайн өтініш береміз
Өтініш беру екі тәсілмен іске асырылуы мүмкін:
1. eGov.kz порталы арқылы («Тұрғын үй көмегін тағайындау» қызметін тағайындау).
2. Халыққа қызмет көрсету орталығына (ХҚКО) жеке бару арқылы.
Өтінішті электронды берген жағдайда электронды цифрлы қолтаңбаға (ЭЦҚ) қол қойылуы қажет.
Тұрғын үй көмегін тағайындау үшін:
жеке куәлік;
өтініш берген тоқсанның алдындағы тоқсан үшінотбасының табысын
растайтын құжаттар;
өткен тоқсан үшін коммуналдық төлемдерге (жылу, су, жарық), сондай-ақ, тұрғын үйді күтіп ұстауға және күрделі жөндеу жұмыстарына шоттар;
байланыс қызметтеріне (телефон және т.б.) түбіртек немесе келісімшарт;
егер тұрғын үй мемлекеттік қордан жалға алынсы – төлем мөлшерін көрсете отырып, жалға алуды растайтын құжат;
банк шотының (IBAN) нөмірі қажет.
Ауған соғысы ардагерлерінің күніне орай, бүгін бірқатар мерекелік іс-шаралар өтті.
Алдымен аудан әкімінің міндетін атқарушы Саят Қабиденұлы ардагерлермен кездесіп, мерекелерімен құттықтап, ізгі тілегін білдірді.
Одан кейін орталық саябақтағы Ауған соғысында қаза тапқан жерлес сарбаздарға арналған ескерткішке гүл шоқтарын қойып, Жамалиден Әлібаев, Асқар Быхин, Нағашыбай Жақтыбаев, Өміртай Құлтабаровтың рухтарына тағзым жасау рәсімі өтті.
Шара аудандық тарихи-өлкетану музейінде өткен дөңгелек үстелде жалғасын тапты.
Аудандық қоғамдық кеңестің төрағасы Сайлау Әлиұлы, аудандық ардагерлер кеңесінің төрағасы Ойрат Жүкібаев, Нағашыбай Жақтыбаевтың жұбайы Татьяна Түсіпқызы, ауған соғысының ардагерлері Серік Жұмабеков, Нұрлан Әубәкіров, Шаймұрат Жұмаділовтер сөз сөйлеп, патриоттық тәрбие, отансүйгіштік рух, отанға адал қызмет етуге қатысты ой-пікірлерімен бөлісті.
Мәнді сұхбат әсем әнмен әрленіп, Өнер мектебінің тәлімгері Айтолқын Шаймерденова өз өнерін тарту етті.
Демалыс күні Қарқаралы қаласындағы шаңғы базасында шаңғымен жүгіруден V ашық Қарқаралы марафоны өтті.
Мемлекет саясатының басым бағыттарының бірі – халық арасында салауатты өмір салтын қалыптастыру, өскелең ұрпақты тәрбиелеу, жастарды спортқа баулу және бұқаралық спортты дамыту болып табылады. Осы мақсатта ұйымдастырылған дәстүрлі марафон табиғаты көркем, туристік әлеуеті жоғары Қарқаралы қаласында жоғары деңгейде өтті.
Ашық марафонға Астана, Көкшетау, Павлодар, Қарағанды қалаларынан және аудан өңірлерінен 50-ге жуық спортшы қатысты.
Жарыс қашықтықтары келесідей болды:
– оқушы қыздар – 5 шақырым;
– оқушы ұлдар – 10 шақырым;
– ересек әйелдер – 15 шақырым;
– ерлер – 30 шақырым.
Марафонның жалпы жүлде қоры 500 мың теңгені құрады. Сонымен қатар, V ашық марафонға арнайы эскизбен жасалған медальдар табысталды. Медаль дайындауға демеушілік көрсеткен жергілікті кәсіпкерлер – өңір спортына тұрақты қолдау білдіріп жүрген азаматтар Айдос Жазитұлына, Жақсылық Қайырбекұлына, Жарылқасын Несіпханұлына ерекше алғыс білдіреміз.
Сондай-ақ, аталған марафонды ұйымдастыруға бастамашы болып, жыл сайын өткізілуіне тікелей атсалысып келе жатқан белгілі спортшы, марафоншы Думан Бейсенаевтың еңбегін ерекше атап өткен жөн.
Жеңімпаздарға сүт және тағам өнімдерімен демеушілік көрсеткен отандық «NATIGE» сүт фабрикасының басшылығына да алғысымызды білдіреміз.
Жарыс қорытындысы бойынша жеңімпаздар арнайы жасалған медальдармен, бағалы сыйлықтармен және ақшалай сыйақымен марапатталды.
Іс-шараға қала тұрғындары мен спортшылар отбасыларымен келіп, қатысушыларға қолдау көрсетті. Патриоттық әндер шырқалып, марафон жоғары көңіл-күйде өтіп, көрермендер мен спортшыларға мерекелік әсер сыйлады.
2026 жылғы 8 қаңтарда Қарағанды қаласында грек-рим күресінен U17 жасөспірімдер арасында Қарағанды облысының біріншілігі өтті. Аталған жарысқа ауданымыздың спортшылары қатысып, жүлделі орындарға ие болды.
Атап айтқанда, 110 кг салмақ дәрежесінде Тожибаев Давронбек III орын, ал 80 кг салмақта Төлеубай Сүлейман II орын иеленді. Спортшыларды жарысқа дайындаған жаттықтырушы – Алиев Қайырбек.
2026 жылғы 9 қаңтарда Қарағанды қаласында грек-рим күресінен U23 жас санаты бойынша Қарағанды облысының біріншілігі өтті. Бұл жарыста 72 кг салмақ дәрежесінде Татан ауылының спортшысы Хамза Нұрлыбек III орынға ие болды. Оның бапкері – Жеңіс Ақшонтаев.
Аталған спортшы Қарағанды облыстық спорт мектеп-интернатының 11-сынып оқушысы.
2025 жылғы 26 желтоқсанда Қарқаралы қаласындағы Ш. Жандарбекова атындағы Мәдениет үйінде аудан әкімі атынан ұйымдастырылған «Жыл үздігі – 2025» жыл қорытындысына арналған салтанатты шара өтті.
Іс-шара барысында ауданның әр саласында үздік атанған азаматтар марапатталды. Атап айтқанда, «Жігер», спорт, құқық қорғау, коммуналдық, денсаулық сақтау, әлеуметтік, өнеркәсіп, ауыл шаруашылығы, білім беру, мәдениет салаларының үздіктері, сондай-ақ үздік мемлекеттік қызметші анықталды. Сонымен қатар жастарға арналған «Сұңқар» сыйлығы табысталды.
«Жыл адамы – 2025» номинациясы бойынша Ақшонтаев Айдос Жәзитұлы үздік деп танылды.
Марапаттау рәсіміне ауданның ардагерлері, аудандық мәслихат пен қоғамдық кеңес өкілдері қатысты. Үздік атанған азаматтарды аудан әкімінің міндетін атқарушы Саят Қабиденұлы құттықтады.
Алда келе жатқан Тәуелсіздік күні мерекесіне орай, 2025 жылғы 6 желтоқсанда Нұркен ауылында Қарағанды облысы бойынша асық атудан ашық турнир өтті.
Жарысқа Павлодар, Жамбыл, Ұлытау, Ақмола облыстары мен Қарағанды өңірінен барлығы 14 команда қатысты. Турнирдің басты мақсаты – жеткіншектерге ұлттық спортты насихаттау, ұлттық рух пен салт-дәстүрді дәріптеу.
Асық ату сайысындағы сұр мергендердің тартысты додасы нәтижесінде үш үздік команда жүлделі орындарға жайғасты. Атап айтқанда:
1-орын — Павлодар облысы, Екібастұз қаласы
2-орын — Шет ауданы, Ақжал кенті
3-орын — Теміртау қаласы, Қарағанды облысы
Жеңімпаз командалар ақшалай сыйлықтармен, кубоктармен және төсбелгілермен марапатталды.
Аудан әкімдігінің қолдауымен өткен іс-шараның жоғары деңгейде өтуіне атсалысқан Нұркен ауылының жастарына алғыс блдіреміз!