АҚШ Энергетика министрлігінің Ядролық қауіпсіздік жөніндегі ұлттық әкімшілігінің радиологиялық қауіпсіздік офисінің қолдауымен ҚР ЭМ Атомдық және энергетикалық қадағалау мен бақылау комитеті (ҚР ЭМ АЭҚБК) 2021 жылғы 21 маусым мен 1 шілде аралығындағы кезеңде Алматы қаласында «RAILS іздеу және қорғау бағдарламасы (иесіз иондаушы сәулелену көздерін іздеу)» атты оқу курсын ұйымдастырды және өткізді.
Оқу курсы Ядролық физика институтының Ядролық қауіпсіздік жөніндегі оқу орталығының базасында өткізілді.
Қазақстанның атом саласы ұйымдарының өкілдері, сондай-ақ ҚР Ұлттық қауіпсіздік комитетінің, ҚР Ішкі істер министрлігінің, ҚР Денсаулық сақтау министрлігінің, ҚР ҚР ЭМ АЭҚБК қызметкерлері қатысты.
Оқу курсы теориялық және практикалық сабақтардан тұрды. Теориялық сабақтарды американдық сарапшылар ZOOM – платформасын пайдалану арқылы онлайн режимінде өткізді. Курс қатысушыларына радиациялық қауіпсіздікке, атап айтқанда иесіз көздерді іздеуге байланысты жағдайларға жауап беру міндеттері берілген.
RAILS аббревиатурасы «Шынайы адаптивті интерактивті оқыту жүйесі» (Realistic Adaptive Interactive Learning System) дегенді білдіреді. Бұл жүйе пайдаланушыларды «иесіз» радиоактивті көздерді (мысалы, жоғалған немесе ұрланған, реттеушілік бақылаудан тыс радиоактивті көздер) іздеу мақсатында радиоактивті/ядролық материалдарды анықтау жабдығын (RND) пайдалануға үйрету үшін әзірленген.
Оқу материалын игеру және бақылау тапсырмаларын орындау (радиоактивті көздерді табу, оқшаулау және сәйкестендіру) кезінде бұл курс қатысушыларға радиация негіздерінен RND жабдығы туралы арнайы білімге дейін қажетті ақпаратты алуға, көздерді іздеу және қорғау, буып-түю және тасымалдау тиісті рәсімдерінде, радиоактивті материалдарды тарату құрылғыларында (RDD) және радиоактивті көздерді оқшаулаудың қазіргі заманғы тұжырымдамаларында түсінігін арттыруға мүмкіндік берді.