БЖЗҚ филиалдары қалай жұмыс істейді?

Қазақстанның бірқатар өңірінде төтенше жағдай тәртібінің тоқтатылуына байланысты Қор кеңселері ішінара бұрынғы жұмыс кестесіне оралды. Мәселен, 2022 жылдың 14 қаңтарынан бері Солтүстік Қазақстан, Павлодар және Батыс Қазақстан облыстарында, 17 қаңтардан бері Ақмола, Ақтөбе, Шығыс Қазақстан, Қарағанды, Қостанай, Түркістан облыстары мен Шымкент қаласындағы қызмет көрсету кеңселері әдеттегі кесте: сағат 09:00-ден 18:00-ге дейін салымшылар мен алушыларға қызмет көрсету тәртібін жандандырды.

 Нұр-Сұлтан мен Алматы қалалары, сондай-ақ Атырау, Алматы, Жамбыл, Қызылорда және Маңғыстау облыстарында 2022 жылдың 19 қаңтарына дейін төтенше жағдай тәртібінің сақталуына байланысты салымшылар мен алушыларға Қор кеңселері сағат 09:00-ден 16:00-ге дейін қызмет көрсетуін жалғастырады.

 Бұл ретте, өңірдегі жағдайдың жалпы тұрақтануын ескере отырып, Алматы қаласында Сейфуллин көшесі, 168 Б, Ақсай 1 ықшамауданы, Төле би көшесі, 15 «Б» мекенжайында орналасқан бөлімшелер күндізгі қызмет көрсету тәртібіне кірісті, сондай-ақ, Қордың Жамбыл облыстық филиалының Шу қаласындағы, Қордай және Меркі ауылдарындағы қызмет көрсету орталықтарында салымшыларға жеке қызмет көрсету қайта басталды.

 БЖЗҚ байланыс орталығы салымшылар мен алушылардың сұрақтарына 9:00-ден 18:00-ге дейін жауап береді.

 Естеріңізге сала кетейік, БЖЗҚ қызметтерін онлайн-форматта да алуға болады. Салымшылар БЖЗҚ сайты мен мобильді қосымшадағы жеке кабинет арқылы кез келген уақытта, әрі кез келген жерде қызмет ала алады. Мысалы, бұған жеке зейнетақы шотынан үзінді-көшірме алу, өз деректемелеріне өзгерістер мен толықтырулар енгізу, ЖЗШ-ның болуы туралы анықтама алу, мерзімсіз уақытқа 1 немесе 2 топтағы мүгедектіктің белгіленуіне байланысты зейнетақы төлемдерін тағайындау туралы, сондай-ақ, ерікті зейнетақы жарналары бойынша өтініш беру, төлемге өтініштің орындалу мәртебесін қадағалау және т.б қызметтер жатады.

БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. 2016 жылғы 1 қаңтардан бастап зейнетақы активтерін басқару тиімділігін арттыру бойынша ұсыныстар жасау қызметі Қазақстан Республикасының Президенті басшылық ететін Ұлттық қорды басқару кеңесіне берілді. Зейнетақы заңнамасына сәйкес БЖЗҚ міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, зейнетақы төлемдерін, зейнетақы жинақтары мен төлемдерін жеке есепке алуды жүзеге асырады, салымшыға (алушыға) зейнетақы жинақтарының жай-күйі туралы ақпарат береді (толығырақ www.enpf.kz сайтында).