«Cыйға тарту шарты бойынша мемлекеттің мүлік құқығына ие болу қағидасын бекіту туралы» Қазақстан Республикасы Үкіметінің 2011 жылғы 28 қыркүйектегі № 1103 қаулысына өзгерістер енгізу туралы

Қазақстан Республикасының Үкіметі ҚАУЛЫ ЕТЕДІ:

«Cыйға тарту шарты бойынша мемлекеттің мүлік құқығына ие болу қағидасын бекіту туралы» Қазақстан Республикасы Үкіметінің 2011 жылғы
28 қыркүйектегі № 1103 қаулысына мынадай өзгерістер енгізілсін:

преамбуласы мынадай редакцияда жазылсын:

«Мемлекеттік мүлік туралы» Қазақстан Республикасының Заңының
27-бабының 2-тармағына сәйкес Қазақстан Республикасының Үкіметі ҚАУЛЫ ЕТЕДІ:»;

көрсетілген қаулымен бекітілген Cыйға тарту шарты бойынша мемлекеттің мүлік құқығына ие болу қағидасында:

1-тараудың тақырыбы мынадай редакцияда жазылсын:

«1-тарау. Жалпы ережелер»;

2-тараудың тақырыбы мынадай редакцияда жазылсын:

«2-тарау. Сыйға тарту шарты бойынша мемлекетке мүлік құқығын беру тәртібі»;

         15-тармақтың бірінші бөлігі мынадай редакцияда жазылсын:

«15. Ақша түріндегі мүлік бюджеттің кірісіне немесе Қазақстан Республикасының бюджет заңнамасына сәйкес Білім беру инфрақұрылымын қолдау қорына есептеледі. Шетел валютасы осы Қағиданың 7-тармағында көзделген шешім қабылданған күні не меншік иесінің болашақта мүлік құқығын мемлекеттік меншікке өтеусіз беру уәдесін қамтитын шартта белгіленген беру күні айқындалған Қазақстан Республикасы Ұлттық Банкінің валюта айырбастаудың ресми бағамы бойынша тиісті бюджеттің кірісіне немесе Қазақстан Республикасының бюджет заңнамасына сәйкес Білім беру инфрақұрылымын қолдау қорына есептеледі.»;

3-тараудың тақырыбы мынадай редакцияда жазылсын:

«3-тарау. Сыйға тарту шарты бойынша болашақта мемлекетке мүлік құқығын беру тәртібінің ерекшеліктері».

2. Осы қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі.

 

 

Қазақстан Республикасының

Премьер-Министрі                                                    Ә. Смайылов

 

 

«Cыйға тарту шарты бойынша мемлекеттің мүлік құқығына ие болу қағидасын бекіту туралы»
Қазақстан Республикасы Үкіметінің 2011 жылғы 28 қыркүйектегі № 1103 қаулысына өзгерістер енгізу туралы»
Қазақстан Республикасы Үкіметі қаулысының жобасына

САЛЫСТЫРМА КЕСТЕ

 

 

Р/с№	Құқықтық актінің құрылымдық элементі	Қолданыстағы редакция	Ұсынылатын редакция	Негіздеме: 1) түзетудің мәні; 2) енгізілетін әрбір түзетудің дәлелді негіздемесі; 3) тиісті құқықтық актіге сілтеме, тапсырмалардың (бар болса) нөмірі, күні.
1	2	3	4	5
«Cыйға тарту шарты бойынша мемлекеттің мүлік құқығына ие болу қағидасын бекіту туралы» Қазақстан Республикасы Үкіметінің 2011 жылғы 28 қыркүйектегі № 1103 қаулысы
1	преамбула	«Мемлекеттік мүлік туралы» Қазақстан Республикасының 2011 жылғы 1 наурыздағы Заңының 27-бабының 2-тармағына сәйкес Қазақстан Республикасының Үкіметі ҚАУЛЫ ЕТЕДІ:	«Мемлекеттік мүлік туралы» Қазақстан Республикасының Заңының 27-бабының 2-тармағына сәйкес Қазақстан Республикасының Үкіметі ҚАУЛЫ ЕТЕДІ:	«Құқықтық актілер туралы» Қазақстан Республикасы Заңының 25-бабының 5-тармағына сәйкес заңнамалық актілерге сілтеме жасау кезінде олар тіркелген нөмірлерді, сондай-ақ оларды қабылдау күндерін көрсету талап етілмейді.
Cыйға тарту шарты бойынша мемлекеттің мүлік құқығына ие болу қағидасы
2	1-тараудың тақырыбы	1. Жалпы ережелер	1-тарау. Жалпы ережелер	«Құқықтық актілер туралы» Қазақстан Республикасы Заңының 23-бабы 2-тармағының екінші бөлігіне сәйкес нормативтiк құқықтық актiлердегi тарау, параграф, бөлім, кiшi бөлiм тиiсiнше «тарау», «параграф», «бөлім», «кiшi бөлiм» деген сөздермен белгiленедi. Осыған байланысты тараудың тақырыбын өзгертумен байланысты түзетулерді көздеу қажет.
2	2-тараудың тақырыбы	2. Сыйға тарту шарты бойынша мемлекетке мүлік құқығын беру тәртібі	2-тарау. Сыйға тарту шарты бойынша мемлекетке мүлік құқығын беру тәртібі	«Құқықтық актілер туралы» Қазақстан Республикасы Заңының  23-бабы 2-тармағының екінші бөлігіне сәйкес нормативтiк құқықтық актiлердегi тарау, параграф, бөлім, кiшi бөлiм тиiсiнше «тарау», «параграф», «бөлім», «кiшi бөлiм» деген сөздермен белгiленедi. Осыған байланысты тараудың тақырыбын өзгертумен байланысты түзетулерді көздеу қажет.
1	15-тармақтың бірінші бөлігі	15. Ақша түріндегі мүлік тиісті бюджеттің кірісіне есептеледі. Шетел валютасы осы Қағиданың 7-тармағында көзделген шешім қабылданған күні не меншік иесінің болашақта мүлік құқығын мемлекеттік меншікке өтеусіз беру уәдесін қамтитын шартта белгіленген беру күні айқындалған Қазақстан Республикасы Ұлттық Банкінің валюта айырбастаудың нарықтық бағамы бойынша тиісті бюджеттің кірісіне есептеледі.	15. Ақша түріндегі мүлік бюджеттің кірісіне немесе Қазақстан Республикасының бюджет заңнамасына сәйкес Білім беру инфрақұрылымын қолдау қорына есептеледі. Шетел валютасы осы Қағиданың 7-тармағында көзделген шешім қабылданған күні не меншік иесінің болашақта мүлік құқығын мемлекеттік меншікке өтеусіз беру уәдесін қамтитын шартта белгіленген беру күні айқындалған Қазақстан Республикасы Ұлттық Банкінің валюта айырбастаудың ресми бағамы бойынша тиісті бюджеттің кірісіне немесе Қазақстан Республикасының бюджет заңнамасына сәйкес Білім беру инфрақұрылымын қолдау қорына есептеледі.	Қазақстан Республикасы Бюджет кодексінің 52-3-тармағына сәйкестілікке келтіру мақсатында, оған сәйкес Білім беру инфрақұрылымын қолдау қорының мақсаттарына жеке және (немесе) заңды тұлғалардан мемлекеттік меншікке өтеусіз берілетін ақша салықтық емес түсімдер болып табылады.
2	3-тараудың тақырыбы	3. Сыйға тарту шарты бойынша болашақта мемлекетке мүлік құқығын беру тәртібінің ерекшеліктері	3-тарау. Сыйға тарту шарты бойынша болашақта мемлекетке мүлік құқығын беру тәртібінің ерекшеліктері	«Құқықтық актілер туралы» Қазақстан Республикасы Заңының 23-бабы 2-тармағының екінші бөлігіне сәйкес нормативтiк құқықтық актiлердегi тарау, параграф, бөлім, кiшi бөлiм тиiсiнше «тарау», «параграф», «бөлім», «кiшi бөлiм» деген сөздермен белгiленедi. Осыған байланысты тараудың тақырыбын өзгертумен байланысты түзетулерді көздеу қажет.

 

 

Қазақстан Республикасының

Қаржы вице-министрі                                                                                                                                                               Д. Темірбеков

 

 

 

 

Қазақстан Республикасының

Премьер-Министрі

Ә.А. Смайыловқа

 

 

«Cыйға тарту шарты бойынша мемлекеттің мүлік құқығына ие болу қағидасын бекіту туралы» Қазақстан Республикасы Үкіметінің
2011 жылғы 28 қыркүйектегі № 1103 қаулысына өзгерістер енгізу туралы» Қазақстан Республикасы Үкіметі қаулысының жобасына

ТҮСІНДІРМЕ ЖАЗБА

 

 

1. Әзірлеуші мемлекеттік органның атауы.

Қазақстан Республикасының Қаржы министрлігі.

2. Тиісті құқықтық актілерге, Қазақстан Республикасы ратификациялаған халықаралық шарттардың нормаларына, Қазақстан Республикасы қатысушысы болып табылатын халықаралық ұйымдардың шешімдеріне, Президенттің, Президент Әкімшілігі, Үкімет және Үкімет Аппараты басшылығының хаттамалық және өзге де тапсырмаларына сілтеме жасай отырып, жобаны қабылдау үшін негіздемелер және/немесе оны қабылдау қажеттігінің басқа да негіздемелері.

Жоба Қазақстан Республикасы Президентінің 2022 жылғы
13 қыркүйектегі № 1008 Жарлығымен бекітілген Мемлекет басшысының
2022 жылғы 1 қыркүйектегі «Әділетті мемлекет. Біртұтас ұлт. Берекелі қоғам» атты Қазақстан халқына Жолдауын іске асыру жөніндегі Жалпыұлттық
іс-шаралар жоспарының 50-тармағын іске асыру үшін әзірленді, оның шеңберінде «Қазақстан Республикасының кейбір заңнамалық актілеріне Мемлекет басшысының жекелеген тапсырмаларын іске асыру мәселелері бойынша өзгерістер мен толықтырулар енгізу туралы» Қазақстан Республикасының Заңымен Қазақстан Республикасы Бюджет кодексінің 8-тарауы салықтық емес түсімдермен, оның ішінде Білім беру инфрақұрылымын қолдау қорының мақсаттарына жеке және (немесе) заңды тұлғалардан мемлекет меншігіне өтеусіз берілетін ақшаны көздейтін 52-3-бабымен толықтырылды.

3. Жоба бойынша қаржы шығындарының қажеттігі және оның қаржылық қамтамасыз етілуі, оның ішінде қаржыландыру көзі, сондай-ақ қажет болған жағдайда Республикалық бюджет комиссиясының шешімі (тиісті есеп-қисаптар, қаржыландыру көзіне сілтеме, Республикалық бюджет комиссиясы шешімінің көшірмесі міндетті түрде түсіндірме жазбаға қоса беріледі).

Жоба республикалық бюджеттен қаражат бөлуді талап етпейді.

4. Жоба қабылданған жағдайда болжанатын әлеуметтік-экономикалық, құқықтық және (немесе) өзге салдар, сондай-ақ жоба ережелерінің ұлттық қауіпсіздікті қамтамасыз етуге ықпалы.

Жобаны қабылдау теріс әлеуметтік-экономикалық және (немесе) құқықтық салдарға әкеп соқтырмайды.

5. Нақты мақсаттар мен күтілетін нәтижелердің мерзімдері.

Жобаның мақсаты Білім беру инфрақұрылымын қолдау қорының мақсаттарына жеке және (немесе) заңды тұлғалардан мемлекеттік меншікке сыйға тарту шарты бойынша ақша қабылдау мүмкіндігін нормативтік-құқықтық актіде бекіту болып табылады.

6. Жобада қаралатын мәселелер бойынша Президенттің және/немесе Үкіметтің бұрын қабылданған актілері және олардың іске асырылу нәтижелері туралы мәліметтер.

Жоқ.

7. Енгізілетін жоба қабылданған жағдайда заңнаманы оған сәйкес келтіру қажеттігі (басқа нормативтік құқықтық актілерді қабылдау немесе қолданыстағы актілерге өзгерістер және/немесе толықтырулар енгізу талап етілетін-етілмейтінін көрсету) не ондай қажеттіліктің болмауы.

Талап етілмейді.

8. Ұсынылған халықаралық шарттың жобасын кейіннен ратификациялау қажеттігі туралы ақпарат.

Халықаралық шарт болып табылмайды.

9. Кеңсе Басшысы мен Байланыс және ақпарат министрінің
   2011 жылғы 20 мамырдағы № 25-1-32қпү/22П-қпү бірлескен бұйрығымен бекітілген «Қазақстан Республикасы Үкіметінің мобильдік кеңсесі» ақпараттық жүйесінде беруге рұқсат етілген қызметтік ақпарат тізбесіне сәйкес мемлекеттік құпия және (немесе) қызметтік ақпарат қамтылған жобаларды қоспағанда, жобаны және оған материалдарды Үкімет мүшелерінің мобильдік құрылғыларына «Қазақстан Республикасы Үкіметінің мобильдік кеңсесі» ақпараттық жүйесі арқылы беру мүмкіндігі.

Рұқсат етіледі.

10. Жобаның мемлекеттік органның интернет-ресурсында, сондай-ақ ашық нормативтік құқықтық актілердің интернет-порталында орналастырылғаны туралы ақпарат (күні, байт көлемі).

Жоба 2023 жылғы «_____»________ мемлекеттік органдардың интернет-ресурстарының бірыңғай платформасында, 2023 жылғы «_____»________ http://www.legalacts.egov.kz ашық нормативтік құқықтық актілердің интернет-порталында орналастырылған (файл мемлекеттік және орыс тілдерінде  ____ КБ, есеп қоса беріледі).

11. Әлеуметтік маңызы бар қаулы жобасына баспасөз релизінің уәкілетті мемлекеттік органдардың интернет-ресурсында орналастырылғаны туралы ақпарат.

Жобаға баспасөз релизі мемлекеттік органдардың
интернет-ресурстарының бірыңғай платформасында 2023 жылғы «_____»________ орналастырылды.

12. Жобаның Қазақстан Республикасы ратификациялаған халықаралық шарттарға және Қазақстан Республикасы қатысушысы болып табылатын халықаралық ұйымдардың шешімдеріне сәйкестігі.

Сәйкес келеді.

13. Жобаның қолданысқа енгізілуіне байланысты жеке кәсіпкерлік субъектілері шығынының азаюын және (немесе) ұлғаюын растайтын есеп-қисаптар нәтижелері.

Талап етілмейді.

14. Қазақстан Республикасы Ұлттық кәсіпкерлер палатасының және кәсіпкерлік субъектілері сараптамалық кеңестері мүшелерінің сараптамалық қорытындысымен келіспеу себептерінің дәлелді негіздемесі.

 «Атамекен» Қазақстан Республикасының Ұлттық Кәсіпкерлер палатасының және Қазақстан Республикасының Қаржы министрлігінің жанындағы Жеке кәсіпкерлік мәселелері жөніндегі сараптамалық кеңес мүшелерінің ескертулері жоқ.

15. «Қоғамдық кеңестер туралы» Қазақстан Республикасының Заңында мемлекеттік органда қоғамдық кеңес құру көзделмеген жағдайларды қоспағанда, егер Үкімет қаулысының жобасы азаматтардың құқықтарын, бостандығы мен міндеттерін қозғайтын болса, қоғамдық кеңестің ұсынымымен келіспеу себептерінің негіздемесі.

Талап етілмейді.

 

 

Қазақстан Республикасы
Премьер-Министрінің

орынбасары –

Қаржы  министрі                                                               Е. Жамаубаев

Дата публикации

26 января 2023