ҚР Жоғары аудиторлық палатасы және БҰҰ Даму бағдарламасы Тұрақты даму мақсаттарына қол жеткізу бойынша ынтымақтастықты жалғастырады

ҚР Жоғары аудиторлық палатасының төрағасы Әлихан Смайылов Қазақстандағы БҰҰ Даму бағдарламасының тұрақты өкілі Катаржина Вавьерниамен кездесу өткізді.

Тараптар БҰҰ-ның Тұрақты даму мақсаттарына (ТДМ) қол жеткізудегі жоғары аудит органдарының рөлін, одан әрі өзара іс-қимыл жасау бағыттарын және басқа да бірқатар өзекті мәселелерді жан-жақты талқылады.

Мемлекет басшысы Қасым-Жомарт Тоқаев Нью-Йорктегі БҰҰ Саммитінде атап өткендей, ТДМ-ге қол жеткізу Қазақстан үшін ұлттық басымдықтардың бірі болып табылады.

«Жоғары аудиторлық палатаның алдында ТДМ-ге қол жеткізуге тікелей әсер ететін бағдарламалық құжаттарды іске асыру және мемлекеттік ресурстарды тиімді пайдалану бойынша тиісті аудитті қамтамасыз ету міндеті тұр», – деп атап өтті Әлихан Смайылов.

Әлихан Смайылов Жоғары аудиторлық палата халықаралық стандарттарға сәйкес әдістемелік құжаттар мен тәсілдерді өзектендіру бойынша жұмыстар жүргізгенін атап өтті. Сонымен қатар Жоғары аудиторлық палата ТДМ және орнықты дамудың негізгі көрсеткіштері бойынша Халықаралық жоғары аудит органдары ұйымының (ИНТОСАИ) жұмыс тобына кіреді.

«Біз үздік шетелдік тәжірибе мен мемлекеттік аудиттің инновациялық әдістерін тұрақты негізде зерделеуге, халықаралық стандарттарды ұстануға және қызметкерлеріміздің біліктілігін жүйелі негізде арттыруға ұмтыламыз», – деді Әлихан Смайылов.

Оның айтуынша, Жоғары аудиторлық палата БҰҰДБ сияқты халықаралық ұйымдардың зерттеулерді жүзеге асыруда және тәжірибе алмасуда, оның ішінде Тұрақты даму мақсаттарын бағалау мәселелері бойынша техникалық және сараптамалық қолдауын жоғары бағалайды.

Анықтама ретінде: БҰҰДБ қызметінің негізгі мақсаты – тұрақты дамуды қамтамасыз ету, яғни кедейлікті жою, жұмыспен қамтуды және халықтың өмір сүру деңгейін арттыру, білім беру жүйесін жақсарту, қоршаған ортаны қорғау және қалпына келтіру.