2019 жылғы 28 қарашада Қазақстан Республикасының Энергетика министрлігі мен Азия Инфрақұрылымдық Инвестициялар Банкі (АИИБ) Қазақстан Республикасында жаңартылатын энергия көздерін пайдалануды дамытуды қолдау және ынтымақтастық мәселелері бойынша өзара түсіністік туралы меморандумға қол қойды. Меморандум Энергетика министрлігі мен АИИБ арасында жаңартылатын энергия көздері секторындағы ынтымақтастықты дамытуды және Министрліктің осы саладағы АИИБ инвестициялық қызметін қолдауды көздейді.
Министрлік пен АИИБ жаңартылатын энергия көздері саласындағы жобалардың қоршаған ортаға теріс әсерді төмендету үшін маңызы зор екенін атап өтті. Тараптар өз құзыреті мен қызмет бейіні шеңберінде Қазақстан Республикасының экономикасына АИИБ мен басқа да халықаралық қаржы институттары мен жеке инвесторларды қаржыландыруды тарту үшін Институционалдық база мен түйінді шарттарды жетілдіруде өзара ынтымақтаста болады.
АИИБ Қазақстандағы жаңартылатын энергия көздері саласындағы бірқатар жобаларды қаржыландыру бойынша белсенді жұмыс істеуде. Өзара түсіністік туралы Меморандумға қол қою АИИБ-нің осы жобаларға қатысуы үшін берік негіз қалыптастырады. АИИБ Инвестициялық комитеті мақұлдаған Қазақстандағы бірінші жоба Қазақстанның оңтүстігінде Жамбыл облысында қуаты 100 МВт Жаңатас жел электр станциясының құрылысы болып табылады.
ҚР Энергетика министрлігінің Баспасөз қызметі