Еңбекминінің ұжымын мемлекеттік қызметтегі сыбайлас жемқорлыққа қарсы іс-қимыл және алдын алу шаралары туралы хабардар етті

ҚР Еңбек және халықты әлеуметтік қорғау министрлігінде (бұдан әрі – Еңбекмині) ұжыммен кездесу өтті, онда мемлекеттік қызметте сыбайлас жемқорлыққа қарсы іс-қимыл және оның алдын алу бойынша шаралар қабылдау бойынша түсіндіру жұмыстары жүргізілді.

Негізгі баяндамашы ҚР Сыбайлас жемқорлыққа қарсы іс-қимыл агенттігінің превенция қызметінің аса маңызды істер жөніндегі офицері, Сыбайлас жемқорлыққа қарсы қызметтің полковнигі Жазира Жылқышиева болды.

Ол сыбайлас жемқорлыққа қарсы құрамдас бөлікті жақсартуға бағытталған заңнамадағы негізгі өзгерістер туралы, оның ішінде озық халықаралық стандарттар негізінде сыбайлас жемқорлықтың алдын алудың жаңа құралдарын енгізу арқылы хабардар етті.

Қатысушыларға мемлекеттік қызметшілердің шығыстары мен кірістерінің сәйкестігін бақылауға, сыбайлас жемқорлыққа қарсы комплаенс жүйесін жетілдіруге және оны үйлестіруге және т. б. қатысты соңғы түзетулер түсіндірілді.

Бұдан басқа, аса маңызды істер жөніндегі офицер сыбайлас жемқорлыққа қарсы шаралар қолданбаған басшылардың жауапкершілігіне баса назар аударды.

Сыбайлас жемқорлықтың алдын алу жұмыстары Еңбекминінде тұрақты негізде жүргізілетінін айта кеткен жөн. ҚР Сыбайлас жемқорлыққа қарсы
іс-қимыл агенттігі әзірлеген әдістемелік ұсынымдарға сәйкес жыл сайын ведомство қызметіндегі сыбайлас жемқорлық тәуекелдеріне ішкі талдау жүргізіледі.

Ішкі талдау қорытындысы бойынша анықталған сыбайлас жемқорлық тәуекелдеріне ұшыраған қызметкерлермен профилактикалық жұмыстар жүргізілді.

Сонымен қатар, 2023 жылы әдеп жөніндегі уәкіл сыбайлас жемқорлыққа қарсы іс-қимыл жөніндегі заңнаманың, Әдеп кодексінің қолданыстағы нормаларын сақтау мәселелері бойынша профилактикалық сипаттағы 15 іс-шара өткізіп, оған орталық аппараттың, сондай-ақ Еңбекмині Еңбек және әлеуметтік қорғау комитеті аумақтық департаменттерінің мемлекеттік қызметшілері қатысты.