Алматы маңында ұшақтың құлау себептерін Бас мемлекеттік еңбек инспекторы нақтылап жатыр

Қазіргі уақытта ҚР Еңбек және халықты әлеуметтік қорғау министрлігі Еңбек, әлеуметтік қорғау және көші-қон комитетінің төрағасы, Қазақстан Республикасының Бас мемлекеттік еңбек инспекторы Ербол Нұрғалиев апат орнында жұмыс істеп жатыр және әуе апаттың мән-жайлары мен себептерін анықтауда.

Қайғылы оқиға осы жылғы 27 желтоқсанда 7 сағат 22 минутта болды. «Бек Эйр» авиакомпаниясының борты, Алматы – Нұр-Сұлтан бағыты бойынша келе жатқан № Z2100 рейсі ұшу кезінде биіктіктен айырылып, бетонды қоршауды бұзып өтті. Одан әрі ұшақ екі қабатты ғимаратпен соқтығысқан. Бортта 93 жолаушы және 5 экипаж мүшесі болған.

Жолаушыларды шұғыл түрде эвакуациялау бойынша құтқару жұмыстары басталды, өрт болған жоқ.

Алдын ала мәліметтер бойынша, қаза болғандардың саны 12 адамды құрады, зардап шеккендер саны - 35 адам, оның ішінде 5 адам Алматы көпсалалы клиникалық ауруханасына өте ауыр халде жеткізілді.

Әуе апатының себептері мен мән-жайларын зерттеу үшін Үкіметтік комиссия құрылды, оның құрамына түрлі мемлекеттік органдардың өкілдері кірді.

Тергеу нәтижелері туралы қосымша хабарланатын болады.