Жетісу облысының аумағындағы қар көшкіні қауіпті кезеңді қамтамасыз ету және су айдындарындағы қауіпсіздік
Жетісу облысы ТЖ департаментінің қызметкерлері «Jetisymedia» ақпараттық алаңында қысқы кезеңде су айдындарындағы қауіпсіздік және қар көшкінінің қауіпті кезеңі туралы брифинг өткізді.
Қысқы кезеңде су айдындарындағы қауіпсіздік туралы брифингте Жетісу облысы ТЖ департаментінің Азаматтық қорғаныс басқармасының аға офицері капитан Бағдат Тыныбек сөз сөйледі.
Құтқарушылар ауа-райының қолайлы болуына байланысты облыстың су айдындарындағы мұз әлі де нәзік екенін және оның бетінде болу өмірге қауіп төндіретінін атап өтті. Сондықтан осы маусымда жазатайым оқиғалардың алдын алу мақсатында Жетісу облысы ТЖ департаментінің қызметкерлері су айдындарындағы қауіпсіз мінез-құлыққа қатысты халықты тұрақты негізде хабардар етуді жүргізеді.
Полиция қызметкерлерімен, еріктілермен және орман шаруашылығы және жануарлар дүниесі инспекциясымен бірлесіп рейдтік іс-шаралар өткізілуде, онда балықшыларға су айдындарындағы қауіпсіздік қағидаларының негізгі талаптары және осы Қағидаларды орындамаған кезде «Су айдындарындағы қауіпсіздік қағидаларын бұзу немесе орындамау» Қазақстан Республикасының Әкімшілік құқық бұзушылық туралы Кодексінің 412-бабын қолдану жеткізілуде.
Сондай-ақ, 18 қаңтардан 19 қаңтарға қараған түні өтетін Крещения Господня мерекесі қарсаңында құтқарушылар жабдықталмаған және оқытылмаған жерлерде шомылудан бас тартуға кеңес берді, өйткені жарақат пен үсікті болдырмау үшін білікті мамандар ғана алғашқы медициналық көмек көрсете алады. Мереке судағы жазатайым оқиғаға ұшырамауы үшін шомылушыларды қарапайым қауіпсіздік ережелерін сақтауға шақырады.
Сонымен қатар, қар көшкіні қаупі бар кезеңдегі қауіпсіздік туралы Жетісу облысы ТЖ департаментінің Төтенше жағдайлардың алдын алу басқармасының аға инженері азаматтық қорғау аға лейтенанты Бақытжан Әділжанов сөз сөйледі.
2023 жылғы қараша айынан бастап өңірде қар көшкіні қаупі бар учаскелерді бақылау бойынша белсенді жұмыстар жүргізілуде. Гидрометеорологиялық процестер Жетісу облысының таулы және тау бөктеріндегі аудандардағы гидрологиялық жағдайға айтарлықтай әсер етеді. «Қазселденқорғау» ММ филиалының қызмет көрсету аймағында 61 көшкін қаупі бар ошақ тіркелген. Гидрометеорологиялық ахуалдың күнделікті бақылау мақсатында жыл бойы 57 гидробекет қойылды.
Апта сайын көшкін қаупі бар учаскелерге жер үсті зерттеу жүргізіледі. Бүгінгі таңда өздігінен қар көшкінінің түсу қаупі жоқ.
Жетісу облысы ТЖД баспасөз қызметі