Қызылорда облысында су айдындарына шомылу маусымына дайындалуда
Су айдындарындағы төтенше жағдайларға жедел ден қою және шұғыл режимде жұмыс істеу үшін биылғы шомылу маусымы кезеңінде 150 адам және 45 бірлік техника, сондай-ақ жедел-құтқару жасағының 69 құтқарушысы дайынлыққа келтірілді. Олардың иелігінде 23 бірлік жүзу құралы, 50 бірлік сүңгуір жабдықтары мен жарақтары, 19 бірлік техника бар. Жанар-жағармай материалдарының қоры әзірленді. Сонымен қатар, облыс тұрғындары мен қонақтарының су айдындарында қауіпсіздігін қамтамасыз ету мақсатында жедел-құтқару жасағының қызметкерлері су айдындарының түбін тазарту жұмыстарын жүргізуде.
2023 жылдың жазғы шомылу кезеңінде 4 коммуналдық жағажай ашылады деп күтілуде: Шиелі ауданында "Ақ орда", Сырдария ауданында "Қалғандария", Қармақшы ауданында "Мұратбаев" және Қазалы ауданында "Қашқан су". Департамент бастығының орынбасары Б. Қ. Әбдіқадыровтың ақпараты бойынша соңғы 5 жылда облыстың су айдындарында Сырдария өзенінде шомылуға қауіпті 63 учаске анықталды. Жергілікті жерлерде 109 ескерту белгісі мен 55 билборд орнатылған.
Қызылорда облысының Төтенше жағдайлар департаменті Қызылорда облысының жұмыспен қамтуды үйлестіру және әлеуметтік бағдарламалар басқармасымен бірлесіп, жазғы шомылу кезеңінде су айдындарында жұмыссыз азаматтарды рейдтік жұмысқа тарту бойынша шаралар қарастыруда. Сонымен қатар, шомылу кезеңінде осы учаскелерде ТЖ департаментінің қызметкерлері Полиция департаменті, Балық инспекциясы және жергілікті еріктілерді тарта отырып, профилактикалық іс-шаралар мен рейдтер ұйымдастырады. Рейдтік жұмысқа тарту мақсатында еріктілерге "Суда зардап шеккендерге алғашқы медициналық көмек көрсету туралы" қосымша дәрістері өткізіледі.
2022 жылы шомылу кезеңінде Полиция департаментімен бірлесіп, ресми қалалық және жабайы жағажайларда ҚР ӘҚБтК-нің 364-бабы бойынша 42 азамат жауапкершілікке тартылды (жалпы су пайдалану қағидаларын бұзу) және 440-бап бойынша (алкогольдік ішімдіктерді ішу немесе қоғамдық орындарда мас күйінде пайда болу) 5336 азамат жауапкершілікке тартылды.
Қауіпсіз жүріс-тұрыс мәдениетін қалыптастыру мақсатында күн сайын облыс аумағында орналасқан мектептердің оқушыларына және ата-аналарына түсіндіру жұмыстары жүргізілуде. Онлайн режимде облыстың 117 450 оқушысы үшін "Судағы қауіпсіздік ережелері", "Алғашқы дәрігерге дейінгі медициналық көмек көрсету тәсілдері, суда зардап шеккендерді құтқару" бойынша 409 интерактивті сабақ, мектеп басшылары мен мұғалімдерінде судағы қауіпсіздік ережелері бойынша 91 сабақ өткізілді. Күн сайын қоғамдық орындарда болу, су пайдалану және судағы қауіпсіздік қағидаларының талаптарын бұзушылықтардың жолын кесу мақсатында рейдтер мен патрульдер жүргізіледі.
Рейдтік іс-шара барысында облыс тұрғындары мен қонақтарының су айдындарында, демалыс орындарында қауіпсіздігін қамтамасыз ету мақсатында 2573 рейд жүргізілді, 150 мың адам (65 мыңнан астам кәмелетке толмаған) қамтылды, судағы қауіпсіздік ережелері түсіндірілді және жадынамалар таратылды. Жүргізілген профилактикалық жұмыстың нәтижесінде адам қаза болуының саны 38,7% - ға азайды.
Қызылорда облысының ТЖД негізгі ережелерді ескертеді және қатаң тыйым салады:
- алкогольдік және есірткілік мас күйінде суға түсуге, шомылуға;
- қайықтардан, айлақтардан, сондай-ақ осы мақсаттарға бейімделмеген құрылыстардан суға секіруге;
- тексерілмеген және жабдықталмаған орындарға сүңгуге;
- жүзу шекарасын белгілейтін қалтқылар үшін жүзуге, сондай-ақ техникалық және ескерту белгілері маңында жүзуге;
- жүзуге арналмаған заттармен жүзуге;
- су қоймаларын ластау және бітеуге, демалушыларға жарақат әкелуі мүмкін қоқыстарды жағада және киім ауыстыратын бөлмелерде қалдыруға;
- жалған дабылды шақыруға, айғайлауға;
- ересектердің бақылауынсыз балаларға суға түсуге, балаларды жағалауда қараусыз қалдыруға болмайды.
Қызылорда облысы ТЖД
баспасөз қызметі