Есіңізде болсын! Су қателіктерді кешірмейді!

Суға шомылу маусымы басталысымен Алматы облысы ТЖД құтқарушылары су айдындарында қызмет өткерудің күшейтілген нұсқасына көшірілді. Құтқарушылар күн сайын су айдындарының жағалауларында патрульдеу жүргізеді. Демалушылармен суда қауіпсіздік ережелерін сақтау туралы нұсқаулықтар мен әңгімелер жүргізіледі. Қайықтар мен катерлерде ірі су айдындарының жағалау аумақтарындағы судағы патрульдер жүзеге асырылады. Демалыс және мереке күндері бұл жұмыстар екі есе күшейтіледі.

Өткен демалыс күндері Алматы облыстарының ірі су айдындарында, профилактикалық рейдтерге Алматы облысы ТЖД аппаратының қызметкерлері, ҚР ТЖМ №28237 әскери бөлімінің әскери қызметшілері, полиция және жергілікті атқарушы органдардың қызметкерлері қатысты. Іс-шаралар барысында Қапшағай су қоймасында демалушылармен әңгімелесулер өткізілді, қауіпсіздік ережелері бар жадынамалар таратылды.

2022 жылғы шомылу маусымы басталғаннан бері Алматы облысы ТЖД құтқарушылары Алматы және Жетісу облыстарының су айдындарында патрульдеу кезінде 13 адамды құтқарды, оның ішінде 5 бала, өкінішке орай, 11 адам, оның ішінде 4 бала жабдықталмаған жерлерде шомылу кезінде қаза тапты.

Алматы облысының ТЖД азаматтарға судағы қауіпсіздік ережелерін тағы да еске салады: тек жабдықталған жағажайларда және ресми рұқсаты мен құтқару қызметі бар шомылуға арналған басқа да орындарда шомылыңыз; жүзе алмай суға белден жоғары түспеңіз; суға шомылу кезінде бір-біріңізді жоғалтпаңыз; жағалаудан қалқалар мен қоршау белгілерінен алысқа асып жүзбеңіз; толқындар мен дауылды ауа-райында шомылмаңыз; жүзе алмасаңыз, жүзуге арналған шеңберлерді, үрлемелі матрастарды қолданыңыз; қайықтарға жақын жүзбеңіз; қайықтардан, көпірлерден және айлақтардан суға секірмеңіз; ұзақ уақыт шомылмаңыз, гипотермия және шаршау салдары болуы мүмкін; түнгі уақытта және мас күйде шомылмаңыз; балаларды бір минутқа да қараусыз қалдырмаңыз.  

Қауіпсіздік шараларын сақтай отырып, біз өзіміздің және баға жетпес балаларымыздың өмірін сақтаймыз.

Алматы облысы ТЖД баспасөз қызметі