ҚР ТЖМ елімізде суға шомылу маусымының өтуі туралы хабардар етті
2022 жылғы 21 маусымда ҚР Президенті жанындағы Орталық коммуникациялар қызметінде ҚР ТЖМ Азаматтық қорғаныс және әскери бөлімдер комитетінің төрағасы Сыздықов Бауыржан Мәдіұлының қатысуымен брифинг өтті. Брифинг тақырыбы «Елімізде суға шомылу маусымының өтуі туралы».
Төрағаның айтуынша, орталық мемлекеттік органдармен және әкімдіктермен бірлесіп, алдағы шомылу маусымында еліміздің су айдындарында қауіпсіздікті қамтамасыз ету мақсатында кешенді алдын алу жұмыстары ұйымдастырылып, жүзеге асырылуда.
Бүгінгі күні елімізде шомылуға рұқсат етілген 497 орын бар. Оның ішінде 142 коммуналдық және 341 жеке жағажайлар бар, олардың саны артып келеді. 14 орын бойынша нақты иеленушілерді бекіту бойынша жұмыстар жүргізілуде.
ТЖ министрлігінің құтқару бөлімшелері тәулік бойы 493 құтқарушы қызмет атқаратын азаматтар пайдаланатын су айдындарының 125 учаскесін бақылайды.
Еліміздің су айдындарында алдын алу жұмыстары аясында жыл басынан бері 50 адам құтқарылды, оның ішінде 10 бала, шомылу маусымы басталғаннан бері 7 адам құтқарылды, оның ішінде 1 бала. ТЖМ қызметкерлері 43 адамды, куәгерлер - 5 адамды және полиция қызметкерлері – 2 адамды құтқарды.
Бүгінгі күні өкінішке орай, судағы қауіпсіздік ережелерін сақтамау салдарынан адамдардың қаза болу фактілері тіркелді, 81 адам, оның ішінде 32 кәмелетке толмаған адам суға кетті. Суға шомылу маусымы басталғаннан бері 36 адам суға кетті, оның ішінде 19 бала.
Ағымдағы жылы су акваторияларын қамтуды ұлғайту және азаматтардың қауіпсіздігін қамтамасыз ету үшін суға шомылу маусымы басталысымен су қоймаларының қауіпті және күзетілмейтін учаскелерінде Министрліктің қосымша 55 мобильді құтқару бекеттері қойылды. Бұдан басқа, әкімдіктермен және су маңындағы демалыс орындарының иелерімен бірлесіп Министрліктің жедел-құтқару жасақтарында даярлықтан өткен қоғамдық құтқарушылар есебінен 377 объектілік құтқару бекеттері жабдықталуда.
Зардап шеккендерге алғашқы медициналық көмек көрсету үшін коммуналдық және жеке жағажайларда 162 медициналық пункт жұмыс істейді.
Республикада 271 стационарлық бассейн, 161 қаңқалы-модульдік бассейн бар. Бүгінгі күні су жанында 64 балалар лагері жұмыс істейді. Жыл басынан бері осы бассейндер мен балалар шомылатын тайыз бассейндерде 48 мың 700-ден астам бала жүзуге үйретілді. Халық арасында 100 мыңнан астам үгіт-насихат өнімдері таратылды, су айдындарында 1 мың 700-ден астам ескерту және тыйым салу белгілері орнатылды. Халықтың қауіпсіз мінез-құлық мәдениетін қалыптастыру мақсатында еліміздің оқу орындарында 400-ден астам интерактивті сабақтар және халықпен 2 мың 300-ден астам жиын ұйымдастырылып, өткізілді.
Бұдан басқа, «2gis» картографиялық платформасында Алматы облысын қоспағанда, еліміздің барлық өңірлерінде су айдындарында шомылуға тыйым салынған және рұқсат етілген орындар туралы деректер орналастырылған.
Шомылу маусымы басталғаннан бері ІІМ, ЖАО және волонтерлермен бірлесіп 9 мыңнан астам патрульдеу мен рейдтер жүргізілді, оларға 25 мыңға жуық адам жұмылдырылды, олардың нәтижелері бойынша 537 бұзушы әкімшілік жауапкершілікке тартылды.
Сөз соңында Бауыржан Сыздықов азаматтарға судағы қарапайым қауіпсіздік ережелерін қатаң сақтау қажеттігі туралы айтып өтті.
ҚР ТЖМ баспасөз қызметі