ҚР ТЖМ вице-министрі Шығыс Қазақстандағы су тасқынына қарсы жұмыстардың барысымен танысты
Қазақстан Республикасы Төтенше жағдайлар вице-министрі Марат Күлдіков Шығыс Қазақстанға жұмыс сапары аясында Семей қаласындағы су тасқынына қарсы жұмыстардың барысымен егжей-тегжейлі танысты. Пристань, Мирный, Восточный кенттері және Бейбітшілік аралы ауданында жыл сайын 1026 тұрғыны бар 254 тұрғын үйді су басу туындайды. Ағымдағы жылы жергілікті атқарушы органдармен жалпы ұзындығы 2566 метр "Жұмыспен қамту 2021 жол картасы" бағдарламасы шеңберінде жағалауды нығайту жұмыстары жүргізілген. Қазіргі уақытта жердегі жоспарлау жұмыстары мен жағалауды тазарту аяқталып, темірбетон плиталары төселуде. Бұл жұмыстар жоғарыда аталған ауыл тұрғындарын қауіпсіздендіруге және 73 мыңнан астам тұрғынды сумен қамтамасыз ететін құдықты су басуының алдын алуға мүмкіндік береді.
Вице-министр Семей қаласына сапары барысында өрт сөндіру депосын аралап, бөлімшелердің жеке құрамымен кездесті. ҚР ТЖМ №68303 әскери бөліміне барды. Сондай-ақ Бородулиха ауданының Новопокровка ауылында болып, Жура өзенін тереңдету бойынша атқарылып жатқан жұмыстармен танысып қайтты.
ШҚО ТЖД баспасөз қызметі