Төтенше жағдайлар вице-министрі селден қорғау бөгеттерінің құрылысын тексерді

Бүгін Төтенше жағдайлар вице-министрі Марат Күлдіков Ақсай өзенінің бассейнінде және Үлкен Алматы өзенінің жоғарғы ағысындағы Аюсай өзенінің сағасынан төмен орналасқан селден қорғау бөгеттерінің құрылысын тексерді.

Ақсай өзенінің жоғарғы ағысында 18 сел қаупі бар учаске, 25 мұздық, 16 мұздақ және мұздық көлдер орналасқан. Қазіргі уақытта қауіпті аймақта 30 000-нан астам адам тұрады. Ақсай өзеніндегі сел ағынының тікелей әсер ету аймағында тұрғын үй және әлеуметтік мақсаттағы құрылыстар, инфрақұрылымдық және инженерлік объектілер, оның ішінде стратегиялық және республикалық маңызы бар нысандар бар. Ақсай өзені бассейнінде селден қорғау бөгетін салу пионер лагерін, орманшылықты, саяжай алабын, Алматы қаласы елді мекендерін сел тасқынынан инженерлік қорғауды қамтамасыз етеді.

Үлкен Алматы өзенінің жоғарғы ағысында 98 сел қаупі бар учаске, 89 мұздық, 19 мұздақ және мұздық көлдер орналасқан. Қауіпті аймаққа 1937 объект кіреді, онда 11 мыңнан астам адам тұрады. Бөгеттің құрылысы сел тасқынынан, нөсерлі және мұзды сел қатерін барынша азайтуға мүмкіндік береді. Шаруашылық жүргізу объектілері мен демалыс аймақтарын инженерлік қорғауды қамтамасыз етеді.

Селден қорғайтын бөгет объектілерін салу мерзімі 2023 жылы аяқталады деп жоспарланған.

 

 

ҚР ТЖМ баспасөз қызметі