Қазақстан ТЖМ Апаттар медицинасы орталығы: тұрақтылық, даму және дайындық жылы
Апаттар медицинасы орталығының күштерімен 9 194 шығу жүзеге асырылды, 4 007 зардап шеккен адамға медициналық көмек көрсетілді, олардың 1 653-і ауруханаға жатқызылды. Бұл атқарылып жатқан міндеттердің жоғары қарқындылығын және маңызды әлеуметтік рөлін айқын көрсетеді.
2025 жылы қызметтің негізгі бағыттарының бірі ТЖМ-нің өрт сөндірушілерін, құтқарушыларын және медицина қызметкерлерін біріктіретін бірлескен әрекет етудің әмбебап бөлімшелерін қалыптастыру жөніндегі пилоттық жобасын іске асыру болды. Бұл формат төтенше жағдайлардың салдарын жоюда кешенді, үйлестірілген және барынша жедел тәсілді қамтамасыз етіп, өзінің тиімділігін дәлелдеді.
Жоба аясында жол-көлік оқиғалары кезінде әрекет етуге бағытталған әмбебап бөлімшелердің негізгі элементтеріне айналған трассалық медициналық-құтқару пункттерін қайта орналастыру және функционалдық қайта құру жұмыстары жүргізілді.
Бүгінгі таңда осындай үш ТМҚП бөлімшесі жұмыс істейді: Ақмола облысындағы «Макинск» және «Аршалы» ТМҚП, Павлодар облысындағы «Аққулы» ТМҚП. Бұл бөлімшелер тәулік бойы кезекшілік атқарып, күштер мен құралдардың жету уақытын қысқартуды, сондай-ақ оқиға орнында тікелей медициналық көмектің тиімділігін арттыруды қамтамасыз етеді.
Апаттар медицинасы орталығының материалдық-техникалық базасы нығайды. Олардың иелігінде заманауи мамандандырылған медициналық автокөліктер, жедел автокөлік құралдары, жетуі қиын және шалғай аудандарда жұмыс істеуге арналған өтімділігі жоғары автокөліктер, сондай-ақ кез келген климаттық жағдайларда бөлімшелердің тұрақты жұмысын қамтамасыз ететін автономды жылу және энергиямен жабдықтау көздері бар.
Байланыс пен басқару құралдарын дамытуға ерекше назар аударылуда. Бірқатар трассалық медициналық-құтқару пункттері Starlink mini спутниктік байланыс жинақтарымен жабдықталды, бұл күрделі жер бедері бар аймақтарда және ұялы байланыс желілерінің тұрақты қамтуы жоқ жерлерде де шығу бригадаларының байланысының сенімділігін, басқарылуын және іс-қимылдарды үйлестіру деңгейін едәуір арттырды.
Апаттар медицинасы орталығы өрт сөндіру бөлімдері мен жедел құтқару жасақтарының базасында, оның ішінде Апаттар медицинасы орталығының медициналық күштерін тарта отырып, мамандандырылған және әмбебап құтқару бөлімшелері желісін одан әрі дамытуды жоспарлап отыр. Бұл бөлімшелер қауіп-қатері жоғары аймақтарда, республикалық маңызы бар автомобиль жолдарында және жетуі қиын өңірлерде әрекет етуге бағытталып, жедел әрекет ету жүйесін сапалық тұрғыдан жаңа деңгейге шығаруға мүмкіндік береді.
Жыл бойы орталық табиғи және техногендік сипаттағы төтенше жағдайларға, жол-көлік оқиғаларына әрекет етуге тәулік бойы дайындық режимінде жұмыс істеді, сондай-ақ авариялық-құтқару жұмыстарына медициналық және психологиялық сүйемелдеуді қамтамасыз етті.