Газ баллонынан абай болыңыз!
Тұрмыстық газ – күнделікті өмірді жеңілдететін үйреншікті зат. Бірақ, егер сіз қарапайым қауіпсіздік ережелерін сақтамасаңыз, ол қайғылы жағдайдың көзіне айналуы мүмкін.
Соңғы 3 жылда облыс аумағында газ баллон жарылуының 6 оқиғасы орын алды, салдарынан 1 адам қаза тауып, 8 адам түрлі дәрежедегі дене жарақатын алды. Негізінен газ баллондарының жарылуына тұрғындардың өрт қауіпсіздігі қағидаларын қатаң сақтамауы, сондай-ақ, газ баллонының ақаулығы болып табылады.
Осыған байланысты, жылу беру кезеңінде тұрғын үйлердегі өрттердің, газ баллондарының жарылуының алдын алу және болдырмау мақсатында БҚО Төтенше жағдайлар департаменті тұрмыстағы қауіпсіздіктің негізгі ережелерін еске салады:
- газ баллонын суықтан жылы жерге кіргізбеңіз, оны жылу көздерінің жанына қоюға болмайды – күрт кеңею салдарынан жарылыс пайда болады;
- баллонды ауыстырмас бұрын, жаңа және пайдаланылған баллондардың түтіктері жабық екеніне көз жеткізіңіз. Ауыстырғаннан кейін қосылыстардың герметикалығын тексеріңіз (сабын ерітіндісін қолдану арқылы);
- баллонды газ плитасына қосу үшін қауіпсіздік қысқыштарының көмегімен бекітілген таңбасы бар арнайы шлангіні пайдаланыңыз. Оның созылуына немесе қысылуына жол бермеңіз;
- газ құрылғыларын қосу кезектілігін сақтаңыз: алдымен сіріңкені жағыңыз, содан кейін газды ашыңыз;
- қыздырғыштарды үнемі тазалаңыз.
Пайдалану аяқталғаннан кейін баллон кранын жабуды ұмытпаңыз.
Төтенше жағдай орын алғанда 101, 112 (газ қызметі 104) телефондарына қоңырау шалыңыз! Өзіңізді және жақындарыңызды өрттен қорғаңыз!
Мемлекеттік өрт бақылау басқармасы