Жетісу облысының Сарқан ауданында құрғақ шөп пен қамысты шарпыған табиғи өртті сөндіру жұмыстары жалғасуда. Қазіргі уақытта өрт аумағы шамамен 15 гектарды құрайды. Тілсіз жауды ауыздықтауға Төтенше жағдайлар департаментінің күштері, орман шаруашылығының қызметкерлері және ҚР ТЖМ авиациясы жұмылдырылған.
Өрт Борлытөбе орман шаруашылығына қарасты Құрақсу орманшылығының аумағында шыққан. Құрғақ өсімдіктерге таралған жалынды оқшаулап, толық сөндіру үшін тиісті күштер мен құралдар жедел түрде тартылды.
Өртті сөндіру жұмыстарына Жетісу облысының Төтенше жағдайлар департаментінің бөлімшелері мен орман шаруашылығының қызметкерлері қатысуда. Сонымен қатар өртті ауыздықтау шараларына Қазақстан Республикасы Төтенше жағдайлар министрлігіне қарасты «Қазавиақұтқару» АҚ-ның тікұшағы жұмылдырылды.
Өрт ошағына әуеден жалпы 19 рет су төгу жұмыстары жүргізілді. Төгілген судың жалпы көлемі 11,4 тоннаны құрады. Әуе техникасы өрт ошақтарына әсер етіп, жердегі бөлімшелердің жұмысына қолдау көрсетуде.
Қазіргі мәліметтер бойынша, елді мекендер мен шаруа қожалықтарына қауіп төніп тұрған жоқ. Соған қарамастан, өрт сөндірушілер мен орман шаруашылығының қызметкерлері жалынның одан әрі таралуына жол бермеу үшін тиісті шараларды жалғастыруда.
Қазіргі уақытта табиғи өртті сөндіру жұмыстары жалғасып жатыр. Жағдай жұмылдырылған қызметтердің бақылауында.
Мамандар құрғақ ауа райында болмашы тұтанудың өзі ірі өртке ұласуы мүмкін екенін ескертеді. Сондықтан өрт қауіпсіздігі талаптарын сақтау және отпен абай болу төтенше жағдайлардың алдын алуға әрі өңірдің табиғи байлығын қорғауға мүмкіндік береді.
Батылдық, ерлік және өзгеге көмек көрсетуге әрдайым дайын болу — бала кезден бойға сіңетін қасиеттер. Осындай ізгі ниетті жүрегіне серік еткен Талдықорған қаласындағы №29 мектеп-лицейдің кадет сыныбының оқушылары адам өмірін қорғауды басты міндеті санайтын құтқарушылардың кәсіби мерекесін ерекше көңіл күймен қарсы алды.
Құтқарушылар күніне орай Жетісу облысының Төтенше жағдайлар департаментінің қызметкерлері жас кадеттерді мерекемен құттықтап, батылдық пен жанқиярлықты талап ететін мамандықтың маңыздылығы туралы әңгімеледі.
Кездесу жай ғана мерекелік құттықтаумен шектелмеді. Оқушылар құтқарушы болудың мәні, оның жауапкершілігі мен қоғам қауіпсіздігін қамтамасыз етудегі рөлі туралы тағылымды ойлармен бөлісті. Өйткені құтқарушы болу — тек күш пен батылдықтың көрінісі емес. Бұл — кез келген жағдайда сабыр сақтап, шешім қабылдай білу, қиын сәтте тайсалмай әрекет ету және ең бастысы, адам өмірін арашалауға деген шынайы ниет.
Департамент қызметкерлері жас өрендерге оқуда озат болуды, дендерінің сау, рухтарының мықты болуын және алға қойған мақсаттарына нық қадам басуды тіледі. Сондай-ақ болашақта төтенше жағдайлар қызметінің қатарын толықтыруды армандайтын оқушылардың ынтасына ерекше тоқталып, олардың таңдаған жолына сәттілік тіледі.
Бәлкім, бүгінгі кездесу жас кадеттердің бірінің жүрегіндегі арманын одан әрі жалғап, болашақта құтқарушы формасын киіп, көмекке мұқтаж жандарға қол ұшын созуына себеп болар.
Өйткені батырлар бір күнде қалыптаспайды. Олардың ерлікке бастар жолы кейде мектеп партасынан, мамандыққа деген қызығушылықтан, адамға деген құрмет пен ел қауіпсіздігіне үлес қосуға деген ұмтылыстан басталады.
Жетісу облысының Төтенше жағдайлар департаментінде Қазақстан Республикасының Құтқарушылар күніне арналған салтанатты іс-шара өтті. Мереке азаматтық қорғау органдары қызметкерлерінің адал қызметіне, жоғары кәсібилігіне және халықтың қауіпсіздігін қамтамасыз етуге қосқан үлесіне алғыс білдіруге мүмкіндік берді.
Іс-шара аясында үздік қызметкерлерді марапаттау рәсімі өтті. Қызметтік міндеттерін адал атқарғаны, кәсібилігі мен қызметтегі жоғары нәтижелері үшін оларға медальдар мен Құрмет грамоталары табысталып, кезекті арнаулы атақтар берілді.
Сондай-ақ қызметтік міндеттерін орындау кезінде қаза тапқан азаматтық қорғау органдары қызметкерлерінің рухына тағзым етілді. Қатысушылар олардың ерлігіне, жанқиярлығына және антына адалдығына құрмет көрсетіп, бір минут үнсіздікпен еске алды.
Құтқарушы мамандығы жоғары жауапкершілікті, кәсіби даярлықты және кез келген сәтте адамдарға көмек көрсетуге дайын болуды талап етеді. Азаматтық қорғау органдарының қызметкерлері күн сайын халықтың қауіпсіздігін қамтамасыз етіп, төтенше жағдайлардың салдарын жоюға және қиын жағдайға тап болған адамдарға көмек көрсетуге атсалысады.
Құтқарушылар күні – тек кәсіби мереке ғана емес, сонымен қатар өмірін қоғамға қызмет етуге арнаған азаматтарды еске алып, өз міндетін абыроймен атқарып жүрген барша құтқарушыларға құрмет білдіретін ерекше күн.
Жетісу облысының Төтенше жағдайлар департаментінің қызметкерлері Талдықорған қаласындағы «IPM Group» компаниясының өндірістік базасына жұмыс сапарымен барды.
Сапар барысында кәсіпорын өкілдері өндірістік қуаттарды таныстырып, жеке қорғаныс құралдарының заманауи үлгілерін көрсетті. Сондай-ақ олардың техникалық сипаттамалары мен қолдану ерекшеліктері туралы жан-жақты ақпарат берді.
Төтенше жағдайлар кезінде, оның ішінде химиялық және радиациялық зақымдану қаупі туындаған жағдайда халықтың қауіпсіздігін қамтамасыз ету мәселелеріне ерекше назар аударылды. Сонымен қатар халықты қажетті қорғаныс құралдарымен уақтылы қамтамасыз ету және ықтимал төтенше жағдайларға дайындық деңгейін арттыру мәселелері талқыланды.
Мұндай жұмыс кездесулері отандық өндірушілермен өзара іс-қимылды нығайтуға, заманауи технологияларды зерделеуге және жеке қорғаныс құралдарын қолдану мүмкіндіктерін кеңейтуге ықпал етеді.
Басты мақсат — төтенше жағдайларға дайындық деңгейін арттыру және Жетісу облысы тұрғындарының қауіпсіздігін қамтамасыз ету.
Жетісу облысының Төтенше жағдайлар департаменті тұрғын үйлердегі өрт қауіпсіздігі деңгейін арттыру және тұрмыстағы жазатайым оқиғалардың алдын алу мақсатында «Ата-анаңның үйін тексер» республикалық акциясы аясында профилактикалық іс-шаралар өткізді.
Акция барысында тұрғындарға ата-аналарының, қарт туыстары мен жақындарының қауіпсіздігіне қамқорлық жасаудың маңыздылығы түсіндірілді. Тұрғын үйлердің өрт қауіпсіздігі талаптарына сәйкестігін тексеруге ерекше назар аударылды.
Мамандар азаматтарды мұржалардың жай-күйін үнемі тексеріп, оларды күйеден уақытылы тазартуға, электр сымдарының жарамдылығын бақылауға және электр желілеріне шамадан тыс жүктеме түсірмеуге шақырды. Сонымен қатар, улы газдың қауіпті концентрациясын дер кезінде анықтап, газдан уланудың алдын алуға мүмкіндік беретін көміртегі тотығы датчиктерін орнату ұсынылды.
Мұндай профилактикалық іс-шаралар қауіпсіз мінез-құлық мәдениетін қалыптастыруға және азаматтардың жақындарының өмірі мен денсаулығына деген жауапкершілігін арттыруға бағытталған.
Жетісу облысының Төтенше жағдайлар департаменті тұрғындарды жақындарының қауіпсіздігіне бейжай қарамай, олардың үйлерінің жағдайын үнемі тексеріп отыруға шақырады.
Қауіпсіздік отбасынан басталады! Бүгін ата-анаңызға қамқорлық жасаңыз — олардың үйін тексеріп, өмірі мен денсаулығын сақтауға үлес қосыңыз.
Қауіпті жағдайда жедел көмекке келіп, адам өмірін құтқару – өрт сөндірушілердің басты міндеті. Бұл мамандық батылдықты, кәсібилікті және жоғары жауапкершілікті талап етеді.
Сәкен Төлеубекұлы Орынбаев азаматтық қорғау органдары жүйесінде 2002 жылдан бері қызмет етіп келеді. Қазіргі уақытта Талдықорған қаласында 1-МӨСБ қарауыл бастығы болып жұмыс істейді. Қызмет еткен жылдары ол өрт сөндірушілердің де басқа адамдар сияқты қорқыныш сезінетінін түсінді. Алайда борыш сезімі мен өзге адамдардың өміріне деген жауапкершілік оларға ең күрделі жағдайларда да батыл әрекет етуге көмектеседі.
Қызмет еткен жылдары ол ТЖМ жүйесіндегі елеулі өзгерістердің куәсі болды. Бүгінде бөлімшелер заманауи техникамен және жабдықтармен қамтамасыз етіліп, өрт сөндіру бөлімдері жаңартылып, қызмет атқару жағдайлары жақсарып келеді. Сәкен Орынбаевтың айтуынша, өрт сөндірушілердің заман талабына сай қызмет етіп, өз міндеттерін тиімді орындауына мүмкіндік беретін бұл өзгерістер оны шын жүректен қуантады.
2016 жылдан 2023 жылға дейін ол Қазақстан Республикасының өрт-құтқару спорты бойынша ұлттық құрамасының аға жаттықтырушысы болды. Сонымен қатар ол халықаралық дәрежедегі төреші.
Сәкен Орынбаев үшін өрт сөндіру қызметі – адалдық пен кез келген сәтте көмекке келуге дайын болуды талап ететін абыройлы іс. Технологиялар дамып, жабдықтар жаңарғанымен, өрт сөндірушілердің басты мақсаты өзгеріссіз қалады. Ол – адам өмірін құтқару.
Күн суыта бастағанда тұрғын үйлерді жылыту кезіндегі қауіпсіздік мәселесі өзекті бола түседі. Пешті пайдалану талаптарын бұзу, мұржалардың ақаулы болуы және көміртек тотығынан қорғайтын құрылғылардың болмауы қайғылы жағдайларға әкелуі мүмкін.
Бүгін Талдықорған қаласындағы «Қызыл тас» саяжай алқабында Жетісу облысының ТЖД қызметкерлері мүдделі қызметтер мен еріктілермен бірлесіп, ауқымды профилактикалық жұмыс жүргізді.
Мамандар аулаларды аралап, тұрғындарға өрт қауіпсіздігі ережелерін түсіндірді. Сондай-ақ мұржаларды уақтылы тазалау, пештер мен жылыту құрылғыларын дұрыс пайдалану қажеттігін еске салды.
Бұдан бөлек, тиісті санаттағы азаматтардың үйлеріне көміртек тотығын анықтайтын датчиктер тегін орнатылып, мұржалар тазаланады. Мұндай шаралар қауіпті дер кезінде анықтап, адамдардың өмірі мен денсаулығына төнетін қатердің алдын алуға көмектеседі.
ТЖМ ескертеді: өрт қауіпсіздігі талаптарын сақтаңыздар, жылыту жүйелерінің жарамдылығын тексеріп, мұржаларды уақтылы тазалап отырыңыздар. Қарапайым ережелерді сақтау төтенше жағдайлардың алдын алып, адам өмірін сақтауға мүмкіндік береді.
Талдықорған қаласындағы Д. Таранов атындағы № 20 мамандандырылған өрт сөндіру бөлімінде ерекше білім беру қажеттіліктері бар балалар мен мүгедектігі бар ересектерге арналған Ашық есік күні өтті.
Қонақтар өрт сөндірушілер мен құтқарушылардың жұмысымен танысып, арнайы техника мен жабдықтарды көрді. Сондай-ақ жер сілкінісі кезінде қалай әрекет ету керектігін, алғашқы көмек көрсету жолдарын және «112» қызметіне дұрыс хабарласу тәртібін білді.
Кездесудің ең қызықты сәттерінің бірі кинологтар мен адамдарды іздеуге көмектесетін олардың төрт аяқты серіктерімен танысу болды. Қатысушылар төтенше жағдайларда көмекке келуге әрдайым дайын, қауіпсіздікті қамтамасыз ету жолында еңбек етіп жүрген басқа да мамандармен жүздесті.
Құтқарушылар мүгедектігі бар адамдардың қауіпсіздігіне ерекше назар аударып, төтенше жағдай кезінде ақпараттың қолжетімді болуы, қауіпсіз эвакуация және қажетті қолдау көрсетудің маңыздылығын атап өтті.
Іс-шара жылы әрі достық атмосферада өтіп, қонақтарға жаңа білім мен жарқын әсер сыйлады.
«Қауіпсіздікке кедергісіз қадам» — қауіпсіздік әр адамға бірдей қолжетімді болуы тиіс екенін және адам өмірі мен денсаулығына қамқорлық жасаудың шекарасы жоқ екенін еске салатын ұстаным.
Азаматтық қорғау старшинасы Айдын Болатұлы Дакеров азаматтық қорғау органдарында 22 жылдан астам уақыт бойы абыроймен қызмет атқарып, Жетісу облысы ТЖД Талдықорған қаласындағы Дамир Таранов атындағы №20 мамандандырылған өрт сөндіру бөлімінде бөлімше командирі қызметін атқарды.
Ел қауіпсіздігін қамтамасыз ету жолындағы көп жылғы адал еңбегі, кәсібилігі мен жауапкершілігі үшін алғыс білдіреміз!
Сізге зор денсаулық, отбасыңызға амандық, шаңырағыңызға шаттық пен береке, өмірдің жаңа кезеңінде бақ-береке тілейміз!
Бір минутта не болуы мүмкін деп ойлайсыз? Табаны плитаның үстінде қалдырып, телефонға жауап беру үшін шығып кету немесе жай ғана бір сәтке алаңдау. Алайда кейде әдеттегі тамақ дайындаудың өртке айналуы үшін дәл осы уақыттың өзі жеткілікті.
Өсімдік майы ерекше қауіпті. Қатты қызған кезде ол тұтануы мүмкін. Мұндай жағдайда ең бастысы отты су құю арқылы сөндіруге тырыспау. Қызған майға су тиген кезде ол қатты шашырап, жалынның ас үйге лезде таралуына әкелуі мүмкін.
Мұндай жағдайдың алдын алу үшін дайындалып жатқан тағамды қараусыз қалдырмаған жөн. Плита мен оның айналасы таза болуы керек, өйткені жиналған май тез тұтанады. Ас үйдегі сорғышты да үнемі тазалап тұру қажет: оның ішінде жиналған май қалдықтары да өрттің шығуына себеп болуы мүмкін.
Сүлгілерді, майлықтарды, тұтқыштарды және басқа да жанғыш заттарды плитадан алыс ұстаған дұрыс. Қарапайым ереже: жануы мүмкін заттардың ашық отқа немесе қызған бетке жақын болмауы керек.
Егер май тұтанып кетсе, ең бастысы сабыр сақтаңыз. Ыдыстың бетін қақпақпен жабыңыз, мүмкін болса қыздыруды өшіріңіз және өрт туралы дереу 112 нөміріне хабарласыңыз. Жанып жатқан ыдысты орнынан қозғамаңыз және майды сумен сөндіруге тырыспаңыз.
Ас үйдегі өрт көбіне үлкен мәселеден емес, кішкентай ғана немқұрайлылықтан басталады. Сондықтан ас үйден бір минутқа ғана шықсаңыз да, алдымен плитаны өшіріңіз. Бүгінгі бір минуттық сақтық ертеңгі үлкен қауіптің алдын алуы мүмкін.