Жаңа туған нәресте медициналық мекемеге ҚР ТЖМ тікұшағымен жеткізілді

ШҚО ауа-райының күрделі жағдайлары мен жолдардағы көлік қозғалысының шектелуіне байланысты, сондай-ақ кішкентай пациенттің асқынуларын болдырмау мақсатында ТЖМ әуе кемесі жұмылдырылды.

ҚР ТЖМ Қазавиақұтқару ұшқыштары Асхат Құдабаев пен Арман Айбусинов санавиация дәрігерлері бригадасының сүйемелдеуімен сәбиді Алтай қаласынан Өскеменге шұғыл тасымалдауды жүзеге асырды.

Ұшқыштар мен дәрігерлердің кәсіби және үйлесімді әрекеттерінің арқасында бала мен оның анасы ана мен бала орталығына аман-есен жеткізілді, онда олар мамандардың бақылауында.