ШҚО құтқарушылары шомылу кезеңін қорытындылады

Ағымдағы жылы ШҚО ТЖД қызметкерлері облыс су айдындарында шомылу маусымы кезінде 19 адамды құтқарды, оның ішінде-4 бала, рұқсат етілмеген жерлерде шомылған 4 адам суда қаза тапты.

ШҚО ТЖД ақпараттық орталығында өткен брифингте ШҚО ТЖД бастығының орынбасары Қуатбек Кенжебекұлы жоғарыда аталған оқиғалардың себебі қауіпсіздік шараларын сақтамау және балаларды қараусыз қалдыру екенін айтты.

Облыста аумағында  жазғы кезеңде жаппай демалуға арналған 22 учаске анықталды.

Департамент «2024 жылға арналған шомылу маусымы кезеңінде халықтың қауіпсіздігін қамтамасыз ету жоспарын» әзірледі, оның іске асырылуы ай сайын бақыланды. Азаматтардың қауіпсіздігі мақсатында құтқарушылар 2947 рейд жүргізді. Су айдындарының түбін тексеру бойынша сүңгуірлік жұмыстар уақтылы жүргізілді. «Жас құтқарушы» үйірмесі арқылы 560 бала суда шомылудын бастапқы дағдылары оқытылды, оқушылармен және жас құтқарушылармен 22 практикалық сабақ өткізілді.

Барлық су пайдаланушыларға, су айдындарындағы демалыс аймақтарының иелеріне, балалар лагерьлерінің директорларына бекітілген су айдындарында адамдардың қаза болғаны үшін жауапкершілік туралы хаттар жолданды.

Демалушылардың қауіпсіздігін қамтамасыз ету бойынша патрульдеу үшін Бұқтырма су қоймасында мобилді  және жылжымалы бекеттер, сондай-ақ Өскемен қаласының аумағында (КНМ, Меновновский көлдері және Самал жағажайы) қызмет атқарды.

ҚР ӘҚБтК-нің 412-бабы бойынша әкімшілік жауапкершілікке 23 құқық бұзушы тартылды.

ШҚО ТЖД облыста қазіргі уақытта су айдындарында демалу, балық аулау жалғасып жатқанына назар аударды, сондықтан қауіпсіздік шараларын қатаң сақтау керек. Суға жүзу құралдарымен шыққанда құтқару кеудешесін кию, қайықты шамадан тыс жүктемеу және қараңғыда өзендер мен көлдерде болмау қажет.

Төтенше жағдайлар кезінде "112"нөмірі бойынша хабарлау қажет.