Біздің зейнеткерлер – қызметтің мақтанышы
Қарттар күніне орай біз өңірдің қауіпсіздігі жолында өмірінің басым бөлігін арнаған қызметіміздің ардагерлері туралы айтып жатырмыз.
Тоқтарғазы Тоқсейітұлы Тоқсейітов өртке қарсы қорғау қызметіне 1964 жылы келген. Свердлов өрт-техникалық училищесін бітіргеннен кейін, ол қарапайым өрт сөндірушіден қызметін бастаған. Кейін Таврия аудандық ішкі істер бөлімінде өрт инспекторы болып жұмыс істеді. 1978 жылы Мемлекеттік өрт бақылау бөлімінің бастығы қызметіне тағайындалып, одан кейін Шығыс Қазақстан облыстық өртке қарсы қызмет басқармасы басшысының орынбасары қызметін атқарды. Ол 34 жыл бойы өңірдің қауіпсіздігін қамтамасыз етіп, қызметке жетекшілікпен қарады.
Өзімнің алғашқы шынайы «отты шоқтан өтуімді» 1966 жылы бастан өткердім», – деп еске алады Тоқтарғазы Тоқсейітов. «Согра ЖЭО-ның кабель каналы өртенді. Мен ол кезде қарауыл бастығы едім. Электр кабельдері жанып жатты, айналаны күйдіргіш түтін басты. Жарылыс болуы мүмкін екенін түсіндік. Қорыққанымыз рас. Бірақ ешкім де шегінген жоқ. Барлығымыз нақты, ұйымдасқан түрде әрекет еттік. Өртті ең аз шығынмен сөндірдік. №5 цехтағы титан-магний комбинатындағы өртті де ұмытпаймын. Ұнтақ магний жанып жатты, ақ жалын, ессіз температура… Сондай-ақ «Нефтегазмаш» АҚ-ның құю цехындағы, Конденсатор зауытының қоймасындағы және Өскемен ағаш-талшықты плиталар зауытының ағаш сақтау базасындағы өрттер де есімде».
Тоқтарғазы Тоқсейітұлы ішкі қызмет полковнигі шенінде зейнетке шықты. Бірақ зейнетке шыққаннан кейін де жас мамандарды оқытып, өзінің қиын да жауапты қызметін жалғастырды.
Қазіргі таңда Тоқтарғазы Тоқсейітов қызметті қолдауға белсенді атсалысып жүр. Түрлі іс-шараларға қатысады, жас құтқарушыларға ақыл-кеңесін береді. Бүгін Қарттар күніне орай «Алтай ТВ» облыстық арнасында сұхбат беріп, өзінің өмірі, қызметі мен отбасы туралы айтып берді.
Әке жолымен өртке қарсы қызметке қызы Гүлнар, ұлы Қайрат және келіні Гүлнар келді, олар да азаматтардың қауіпсіздігі үшін көп жыл еңбек етіп, зейнетке шықты.
«Өрт сөндіруші болу – батылдық пен ерлікті талап ететін шешім. Ал балаларың мен немерелерің сенің жолыңды жалғастырса, бұл – ата-ана үшін үлкен мақтаныш», – дейді отбасының үлкені, өрт сөндірушілер әулетінің ардагері Тоқтарғазы Тоқсейітов.