Ресейдің Омбы облысында Ресей Федерациясы мен Қазақстан Республикасы ТЖМ-нің халықаралық командалық-штабтық оқу-жаттығулары өтті. Оған 130-дан астам маман қатысып, 32 бірлік техника жұмылдырылды. Қатысушылар шекаралас аумақтарда табиғи өрттер туындаған және таралған жағдайда бірлескен іс-қимылдарды пысықтады.
Қазақстан ТЖМ атынан Павлодар облысы ТЖД бастығы Рустамбек Амрин, Солтүстік Қазақстан облысы ТЖД бастығы Жомарт Асқаров және бейінді бөлімшелердің мамандары қатысты. Іс-шара барысында екі мемлекеттің бөлімшелері арасындағы үйлесімді іс-қимыл, ақпарат алмасуды ұйымдастыру, сондай-ақ өрт жағдайы күрделенген кезде басқару органдары мен тартылған күштердің жедел әрекет етуге дайындығы пысықталды.
Оқу-жаттығулар үш кезеңнен тұрды. Әр кезеңде жағдай біртіндеп күрделеніп, ауа райы шарттары нақты жағдайларға барынша жақындатылды. Қатысушылар шекаралас аумақта ландшафтық өрт туындаған кездегі әрекеттерді, жедел ақпарат алмасуды және қазақстандық бөлімшелерді қарсы алу тәртібін пысықтады. Екінші кезеңде шартты өрт орман қорына таралып, орман шаруашылығы бөлімшелерін тарту, минералдандырылған жолақтар жасау және Ми-8 тікұшақтары мен шағын авиация ұшағын пайдалана отырып, аумақты әуеден патрульдеу ұйымдастырылды. Үшінші кезеңнің сценарийі бойынша өрт елді мекенге жетті. Осыған байланысты күштер мен құралдар тобы күшейтіліп, халыққа хабар беру және тұрғындарды уақытша орналастыру пункттеріне эвакуациялау ұйымдастырылды. Сонымен қатар медициналық, құқық қорғау және көлік қызметтерімен өзара іс-қимыл пысықталды.
Шекаралас өңірлерде өткізілетін бірлескен оқу-жаттығулар – екі елдің төтенше жағдайлар ведомстволарының трансшекаралық қауіп-қатерлерге нақты жағдайларға барынша жақын ортада әрекет етуге дайындығын тексерудің маңызды тетігі.
Қазіргі таңда инженерлік жұмыстар жоспарына сәйкес 13 іс-шара орындалды. Жүргізілген жұмыстар аясында 150 метр қорғаныс бөгеті салынып, нығайтылды, ұзындығы 2 115 метр су бұру арығы салынды, сондай-ақ 5 су өткізу құбыры орнатылып, жөнделді.
Жаңа құбырлар «Богатырь – Қаратай», «Луганск – Константиновка» және «Рождественка – Павловка» автожолдарының учаскелерінде орнатылуда. Жүзеге асырылып жатқан іс-шаралар облыстың қалалары мен аудандарындағы елді мекендерді қамтиды және оларды ықтимал су тасқынынан қорғау деңгейін арттыруға бағытталған. Қалған іс-шаралар бойынша жұмыстар белгіленген мерзімдерге сәйкес жалғасуда.
Қаныш Сәтбаев атындағы каналдың № 4 гидроторабындағы № 87 бөгетті реконструкциялауға ерекше назар аударылуда. 2026 жылы жобаны іске асыру жұмыстары қайта жанданды. Қазіргі уақытта тірек призмасын салу, дренаж жүйесі мен су өлшеу бекетін қалпына келтіру, жоғарғы еңістің плиталарын жөндеу, сондай-ақ автоматтандырылған мониторинг жүйесін орнату жұмыстары жүргізілуде. Құрылыс-монтаждау жұмыстарын 2026 жылғы желтоқсан айында аяқтау жоспарланған.
2027 жылғы су тасқыны кезеңіне дайындық жұмыстары жалғасуда.
Павлодар қаласында өрт сөндіру автокөліктерімен жылдам маневр жасау және өрт сөндіру-құтқару даярлығы бойынша жарыстар өтті. Үздік атану үшін Павлодар облысы ТЖД-нің 20 бөлімшесінің командалары бақ сынады.
Сынақтар қатысушылардан барынша зейінділікті, дәлдікті және үйлесімді әрекетті талап етті. Жарыс 10 кезеңнен тұрды: жол қозғалысы ережелері мен нормативтерді білу бойынша теориялық тест және автодромда өткен тоғыз практикалық тапсырма.
Қатысушылар теміржол өткелінен өтіп, қол тежегішін пайдаланып көпірге көтерілді, «жыланша» ирек жолдан өтті, 90 градусқа бұрылды, жаяу жүргіншілер өткелінен өтіп, бүйірлік тұраққа қою және артқа жүріп гаражға кіру дағдыларын көрсетті.
Қорытынды кезеңде оқпанмен жауынгерлік қанат жаю нормативі орындалды. Бұл сынақта жүргізуші, бөлімше командирі және өрт сөндіруші-құтқарушыдан құралған жауынгерлік есептоптың жылдамдығы, өзара іс-қимылы мен үйлесімділігі шешуші рөл атқарды.
Жарыс қорытындысы бойынша Павлодар қаласы ТЖБ- ның № 4 өрт сөндіру бөлімі 4 минут 04 секунд нәтижесімен жеңімпаз атанды. Екінші орынды Екібастұз қаласы ТЖБ-ның № 2 мамандандырылған өрт сөндіру бөлімі 4 минут 43 секунд нәтижесімен иеленді. Үшінші орын Шідерті кентінің № 14 өрт сөндіру бекетіне бұйырды. Олардың нәтижесі — 4 минут 52 секунд.
Жарыс жүргізушілердің кәсіби шеберлігі мен командалық үйлесімділігін сынап қана қоймай, төтенше жағдайларда жедел әрекет ету мен адамдардың өмірін сақтап қалудағы маңызын тағы бір мәрте көрсетті.
Павлодар облысындағы Құтқарушылар аллеясында салтанатты түрде ант қабылдау рәсімі өтті. Төтенше жағдайлар департаментінің 20 жаңа қызметкері қызметке адал болуға ант берді.
Жас мамандардың басым бөлігі өрт сөндіру бөлімшелеріне жұмысқа қабылданды. Алда оларды адамдардың өмірі мен денсаулығын қорғау, төтенше жағдайларды жою және қиындыққа тап болғандарға көмек көрсету сияқты жауапты міндеттер күтіп тұр.
Жас қызметкерлерге Павлодар облысы Төтенше жағдайлар департаментінің бастығы Рустамбек Амрин ақжолтай тілегін арнады. Ол жас мамандарды құтқарушылар қатарына қосылуымен құттықтап, қызметтік борышына адал болуға, батылдық танытып, кез келген жағдайда көмекке келуге дайын тұруға тілек білдірді.
Сондай-ақ департамент ардагері Алдаберген Карабалин жас әріптестерімен өз тәжірибесімен бөлісті. Ол ұрпақтар сабақтастығының, таңдаған мамандыққа адалдықтың және азаматтық қорғау қызметінің әрбір қызметкеріне жүктелетін жауапкершіліктің маңыздылығын атап өтті.
Ант қабылдау рәсімі жас мамандардың кәсіби жолындағы маңызды кезеңге айналды. Осы күннен бастап олар қызметтік міндеттерін адал атқаруға, азаматтарды қорғауға және ең күрделі жағдайларда да қойылған міндеттерді орындауға дайын болуға міндеттеме алды.
Құрметті әріптестер, ардагерлер, қадірлі құтқарушылар!
Сіздерді «Құтқарушы күні» кәсіби мерекесімен шын жүректен құттықтаймын. Құтқарушы – қазіргі заман қаһарманы. Батылдық пен жанқиярлық қасиеттерге ие тұлға.
Сіздердің кәсібиліктеріңіз бен батылдықтарыңыздың арқасында талай адамның өмірі сақталып, азаматтардың қауіпсіздігі қамтамасыз етілуде.
Қазіргі таңда бірігіп, қол жеткізген жетістіктеріміз аз емес. Президентіміз бен Үкімет тарапынан көрсетілген сенім мен қолдаудың арқасында бұдан да биік жетістіктерге жететінімізге сенімдімін.
Қызметтік міндеттерін атқару кезінде ерлікпен қаза тапқан барлық әріптестердің есімдері мәңгі ел есінде. Жылдар бойы ісіне адал қызмет етіп, енді өздерінің бай тәжірибелерімен жас ұрпақты тәрбиелеп отырған ардагерлерімізге ерекше ризашылығымды білдіремін.
Баршаңызға мықты денсаулық, отбасыларыңызға амандық, халықтың игілігі мен қауіпсіздігі үшін атқаратын қызметте сәттілік пен табыс тілеймін.
Қазақстан Республикасының
Төтенше жағдайлар министрі
Мұрат Мұханов
Павлодар облысы ТЖД «ҚазТрансОйл» АҚ-мен бірлесіп, кәсіпорын аумағында өрт-тактикалық оқу-жаттығуларын өткізді. Іс-шара барысында ТЖД-ның «Қалқан-7» роботтандырылған платформасының мүмкіндіктері таныстырылды.
Оқу-жаттығу барысында өрт сөндірушілер өртті сөндіру тактикасын пысықтап, төтенше жағдайларды жою дағдыларын жетілдірді.
Қатысушыларға техногендік апаттар кезіндегі және адам өміріне қауіп төндіретін басқа да жағдайларда қашықтан өрт сөндіруге арналған «Қалқан-7» платформасының мүмкіндіктері көрсетілді.
Платформа өрт сөндіру жеңін су-көбік қоспасымен бірге қауіпті аймақтарға жылжытуға мүмкіндік береді. Бұл жеке құрамның қауіпсіздігін қамтамасыз етіп, тәуекелдерді азайтуға ықпал етеді. Сондай-ақ оның конструкциясы қойылған міндеттерге сәйкес қосымша жабдық орнатуға мүмкіндік береді.
Мұндай оқу-жаттығулар өрт сөндірушілердің кәсіби даярлығын арттыруға, өрт сөндіру тактикасын жетілдіруге және өнеркәсіптік нысандардағы қауіпсіздікті қамтамасыз ету үшін заманауи технологияларды енгізуге бағытталған.
Азаматтық қорғау органдарындағы қызмет батылдықты, төзімділікті және кез келген сәтте көмекке келуге дайын болуды талап етеді. Ал егер осы құндылықтарды өзіңмен бірге бөлісетін жан үйде сені күтіп отырса ше? Павлодар облысының Төтенше жағдайлар департаментінде 10 отбасылық жұп қызмет етеді. Оларды тек махаббат пен отбасылық қамқорлық қана емес, адамдардың қауіпсіздігін қамтамасыз ету жолындағы ортақ қызмет те біріктіреді.
Жангузиндер отбасы: қызмет, ерлік және төрт бала
Бауржан Жангузин азаматтық қорғау органдарында 2001 жылдан бері қызмет етіп келеді. Бүгінде ол № 5 өрт сөндіру бөлімінің бастығы қызметін атқарады және азаматтық қорғау полковнигі атағына ие. Қызмет барысында көрсеткен ерлігі үшін II дәрежелі «Айбын» орденімен марапатталған. Сондай-ақ «Ерлігі үшін» номинациясы бойынша да ерекшеленген.
Жұбайы Жұлдыз Ахметжанова Жоспарлау және жедел басқару орталығында инженер болып жұмыс істейді. Олар 2005 жылы өрт сөндіру және авариялық-құтқару жұмыстары басқармасында бірге қызмет етіп жүрген кезде танысқан. Екі жылдан кейін шаңырақ көтерген. Бүгінде Жангузиндер отбасы төрт бала тәрбиелеп отыр. Үлкен балалары спорт жолын таңдап, таэквондодан Әлем кубогының чемпиондары атанған. Бұл отбасында жауапкершілік, мақсатқа ұмтылу және тәртіп тек қызметте ғана емес, отбасылық өмірде де маңызды орын алады.
Жангузиндер отбасының тарихы азаматтық қорғау органдарындағы қызмет тек әріптестерді ғана емес, ерлі-зайыптыларды да біріктіре алатынын көрсетеді. Ал өзара түсіністік пен қолдау қызметте де, отбасылық өмірде де берік тірекке айналады.
Құтқарушы мамандығында тек батылдық, кәсібилік және қиын сәтте көмекке келуге дайын болу ғана емес, сонымен қатар адамдардың өмірі мен қауіпсіздігі үшін ерекше жауапкершілік те маңызды. Омаровтар отбасы үшін азаматтық қорғау органдарындағы қызмет өмірінің ажырамас бөлігіне, ортақ іске және көптеген жылдарын арнаған кәсіби мұратқа айналды.
Аскарбек Қайырбекұлы Омаров пен Құрайлай Әзиқызы Омарова — махаббат, отбасы және адамдарға қызмет ету жолында біріккен ерлі-зайыптылар. Олар 2001 жылы шаңырақ көтеріп, содан бері халықтың қауіпсіздігін қамтамасыз етуге бағытталған кәсіби жолда бірге келеді.
Азаматтық қорғау полковнигі Аскарбек Қайырбекұлы Омаров азаматтық қорғау органдарында 1995 жылдың қыркүйегінен бастап қызмет атқарып келеді. 31 жылдан астам уақытқа созылған қызмет жолында ол өрт сөндірушіден бастап Павлодар облысының Төтенше жағдайлар департаменті бөлімшесінің басшысына дейінгі кәсіби белестерден өтті.
Ол еңбек жолын тікелей өртпен күресуден, яғни өрт сөндіруші болып жұмыс істеуден бастады. Бұл кезең кәсіби қалыптасудың маңызды мектебіне айналды. Дәл осы қызмет барысында ұстамдылық, тәртіп, өзара көмек көрсету және күрделі жағдайларда дұрыс әрекет ету дағдылары қалыптасады. Кейін Аскарбек Қайырбекұлы өрт сөндірудің кезекші қызметінің жұмысына байланысты лауазымдарда, сондай-ақ өртке қарсы нормалау мәселелерімен айналысатын бөлімшеде қызметін жалғастырды.
Бүгінде азаматтық қорғау полковнигі Аскарбек Қайырбекұлы Омаров Павлодар облысының Төтенше жағдайлар департаменті Жоспарлау және жедел басқару орталығының бастығы қызметін атқарады. Бұл бағытта сауатты жоспарлау, шешімдерді жедел қабылдау, бөлімшелердің іс-қимылын үйлестіру, сондай-ақ төтенше жағдайларға ден қою үшін күштер мен құралдардың әзірлігін қамтамасыз ету ерекше маңызға ие.
Оның кәсіби жолы — практикалық тәжірибеге, жауапкершілікке және таңдаған ісіне адалдыққа негізделген үздіксіз кәсіби дамудың үлгісі.
Жұбайы — азаматтық қорғау майоры Құрайлай Әзиқызының кәсіби жолы да ерекше маңызға ие. Ол азаматтық қорғау органдарында 18 жылдан астам уақыт бойы қызмет етіп, бөлімшелердің жұмысын қамтамасыз етуге және ведомствоның алдына қойылған міндеттерді орындауға өз үлесін қосып келеді.
Қазіргі уақытта Құрайлай Әзиқызы арнайы жұмыстар бөлімшесінің бастығы қызметін атқарады. Бұл жұмыс жоғары ұйымдастырушылық қабілетті, мұқияттылықты, тәртіпті және жауапкершілікті талап етеді. Әрбір орындалған тапсырманың артында кәсіби дайындық, іс-қимылдардың үйлесімділігі және ортақ нәтижеге қол жеткізудің маңызын түсіну тұр.
Қызметтік жүктеме мен жоғары жауапкершілікке қарамастан, Омаровтар отбасы бала тәрбиесіне ерекше көңіл бөледі. Олар үш баланы — бір ұл мен екі қызды тәрбиелеп отыр. Ата-ана үшін балаларға қамқорлық пен қолдау көрсету ғана емес, сонымен қатар өз үлгісі арқылы адал еңбектің, адамдарға құрметпен қараудың, өз іс-әрекеттері үшін жауапкершілік алудың және таңдаған жолына адал болудың маңызын көрсету де маңызды.
Ата-анасының екеуі де азаматтық қорғау органдарындағы қызметке өзін арнаған отбасында өзара көмектің, ұстамдылық пен қолдаудың қадірі ерекше түсініледі. Кәсіби міндеттер жинақылық пен жанқиярлықты талап етсе, отбасы ошағы күш-қуат жинап, қуанышты сәттермен бөлісіп, жақындарынан қажетті қолдау табатын орын болып қала береді.
2001 жылы шаңырақ көтерген Аскарбек Қайырбекұлы мен Құрайлай Әзиқызы жауапты қызметті бала тәрбиесімен және отбасылық құндылықтарды сақтаумен ұштастыра білді. Олардың тарихы — көптеген жылдар бойы қатар жүріп, бір-біріне қолдау көрсетіп, өздерінің өмірлік мұраттарына адал болып келе жатқан жандардың өнегелі жолы.
Омаровтар отбасы — қоғамға қызмет ету ортақ іске айналып, кәсіби жауапкершілік отбасылық қамқорлықпен және өзара құрметпен ұштасатындығының жарқын үлгісі. Олардың өмір жолы азаматтық қорғау органдарының қызметінің артында тек бөлімшелер мен арнайы техника ғана емес, өзгелерге көмек көрсетуді өмірлік ісіне айналдырған адамдар тұрғанын еске салады.
Осындай отбасылар кәсібіне деген адалдығы, көпжылдық еңбегі және өскелең ұрпаққа адалдық, табандылық, мейірімділік пен жауапкершілік сияқты ізгі адами қасиеттерді үлгі етуге деген ұмтылысы үшін зор құрметке лайық.
Павлодар облысының Төтенше жағдайлар департаментінің қызметі, материалдық-техникалық базаны жаңарту және жаңа бағыттарды дамыту туралы Құтқарушы күні қарсаңында ұйымдастырылған баспасөз туры барысында департамент бастығының орынбасары Қайрат Шаймарденов баяндады.
Бұқаралық ақпарат құралдарының өкілдеріне ведомствоның қызметі, материалдық-техникалық базаны жаңарту, жаңа бағыттарды дамыту және халықтың қауіпсіздігін арттыру шаралары таныстырылды.
Модернизация бағыттарының бірі — Toyota Hilux автокөлігі негізінде жабдықталған жылжымалы өрт-техникалық зертхана. Өрт сынақ зертханасының мамандары арнайы жабдықтарды орналастыруға және сарапшының жұмыс орнын ұйымдастыруға арналған жылжымалы металл конструкциясын жүк бөлігіне орнатқан. Бұл өрт болған жерде қажетті жедел талдаулар жүргізуге, өрттің шығу себептерін қысқа мерзімде анықтауға және, соның ішінде жету қиын аумақтарда, сараптамалық зерттеулердің сапасын арттыруға мүмкіндік береді.
Тағы бір маңызды бағыт — кинологиялық қызметті дамыту. Павлодар қаласында кинологиялық бөлімше ашылуда. Бұған дейін мұндай бөлімше тек Екібастұз қаласында жұмыс істеген. Қазіргі уақытта департаменттің иелігінде сертификаттаудан өткен және іздестіру-құтқару жұмыстарына жіберілген екі қызметтік ит бар. Олар үйінділер астында және жету қиын жерлерде қалған адамдарды іздеуге көмектеседі.
Өрт сөндіру-құтқару инфрақұрылымын жаңарту жұмыстары да жалғасуда. 2026 жылғы сәуірде Екібастұз қаласына қарасты Солнечный кентінде төрт автокөлікке арналған өрт сөндіру депосының құрылысы аяқталып, № 22 өрт сөндіру бекеті құрылды. Атамекен кентіндегі өрт сөндіру бөлімшесі жаңғыртудан өтті, ал Павлодар қаласындағы № 3 өрт сөндіру бөлімшесін жаңарту жұмыстары жалғасып жатыр.
Жалпы, өңірде кемінде 13 өрт сөндіру депосын салу қажет. «Ауыл құтқарушылары» бағдарламасы аясында облыста жаңа ауылдық өрт сөндіру бекеттері ашылып, қолданыстағы бекеттер жаңғыртылуда. Бүгінгі таңда 13 өрт сөндіру бекеті ашылды: оның алтауы жаңадан құрылса, жетеуі жаңғыртудан өтті. 2026 жылы 34 өрт сөндіру бекетінде жұмыс жүргізу жоспарланған. Оның ішінде 17 жаңа бекет ашылып, қолданыстағы 17 бекет жаңғыртылмақ.
Бөлімшелерді қажетті техникамен жабдықтауға да ерекше көңіл бөлінуде. 2026 жылы жергілікті бюджет есебінен 12 техника бірлігі сатып алынды. Олардың қатарында он өрт сөндіру автоцистернасы, автоколенкалы көтергіш және жанармай құю көлігі бар. Қазіргі уақытта техникаларды жеткізу күтілуде. 2027–2028 жылдары тағы 13 өрт сөндіру автоцистернасын, автосатысы бар автоцистернаны, батпақты жерлерде жүретін арнайы көлікті және гидроцикл сатып алу жоспарланған. Сонымен қатар бөлімшелерге тыныс алу аппараттарын, авариялық-құтқару құралдарын, байланыс құралдарын және ұшқышсыз ұшу аппараттарын сатып алу көзделген.
2026 жылдың 9 айында бөлімшелер авариялық-құтқару және шұғыл жұмыстарға 4 370 рет шықты. Жұмыс барысында 600 адам құтқарылды. Оның ішінде 300 адам эвакуацияланып, зардап шеккен 262 адамға алғашқы медициналық көмек көрсетілді.
Баспасөз туры журналистерге ТЖД қызметінің әртүрлі бағыттарымен — өрт себептерін техникалық сараптаудан бастап іздестіру-құтқару операцияларына дейін танысуға мүмкіндік берді. Әрбір жаңарту мен жаңа жобаның түпкі мақсаты — бөлімшелердің төтенше жағдайларға дайындығын арттыру және Павлодар облысы тұрғындарының қауіпсіздігін қамтамасыз ету.
Махаббат қана емес, адамдарға қызмет ету және олардың қауіпсіздігін қорғау жолындағы ортақ мақсат біріктіретін отбасылар бар.
Дастан Абукумарович Искара мен Асель Жанибекқызы Таева азаматтық қорғау органдарындағы қызметтерін 2005 жылы бастаған. Дәл осы жерде олар танысып, кейіннен махаббатқа, өзара құрмет пен қолдауға негізделген берік отбасы құрды.
Бүгінде Дастан Абукумарович азаматтық қорғау полковнигі шенінде Май ауданындағы төтенше жағдайлар бөлімінің бастығы қызметін атқарады. Ал жұбайы Асель Жанибекқызы азаматтық қорғау старшинасы шенінде Павлодар қаласы Төтенше жағдайлар басқармасына қарасты № 3 өрт сөндіру бөлімінде радиотелефонист болып жұмыс істейді.
Жиырма жылдан астам уақыт бойы ерлі-зайыптылар батылдықты, сабырлылықты және жоғары жауапкершілікті талап ететін қызметке өз өмірлерін арнап келеді. Оларды кәсіби борышқа адалдық, көмекке мұқтаж жандарға қол ұшын созуға дайын болу және таңдаған мамандығына деген шынайы берілгендік біріктіреді.
Отбасының басты байлығы — төрт қызы. Ерлі-зайыптылар қыздарын сүйіспеншілік пен қамқорлыққа бөлеп өсіріп, олардың бойына мейірімділік, адалдық және адамдарға құрметпен қарау қасиеттерін сіңіруде. Олар балалары үшін еңбекқорлықтың, жауапкершіліктің және өз ісіне адалдықтың жарқын үлгісі болып табылады.
Бұл отбасының тарихы — қызметтің өмірлік тағдырға айналып, ортақ істің жүректерді біріктіре алатынының айқын көрінісі.
Құтқарушылар күні қарсаңында ерлі-зайыптыларға зор денсаулық, отбасылық бақыт пен береке, қызметтеріне толағай табыс және кезекшіліктерінің тыныш өтуін тілейміз!