Бүгін Қызылорда облысы өңірлік коммуникациялар орталығында Қызылорда облысы Төтенше жағдайлар департаментінің бастығының орынбасары азаматтық қорғау полковнигі Ибрагимов Нұрсұлтан Жаңабайұлы «19-қазан – Құтқарушылар күніне» орай брифинг барысында сұхбат берді.
Сұхбат барысында спикер былай деді: «Құтқарушы мамандығы - ержүрек, батыл жандардың мамандығы. Сондықтан әрқашан құтқарушының мәртебесі биік. Халықтың тыныс-тіршілігі мен аумақтың қауіпсіздігін қамтамасыз етуде мемлекеттік маңызы бар мәртебелі мамандық, ең қажетті, құрметті және игі кәсіптердің бірі.
Елге адал қызмет ете жүріп, өз өмірін қатерге тіккен Кенжебай Жақыпов, Арғын Әшірбеков, Арман Төлеубаев, Қазбек Төреманов қызмет бабында жүріп қаза болды. Біз осы асыл азаматтарымыздың ерлік істерін мақтан етеміз, еске аламыз. Жыл сайын "19 қазан – Құтқарушылар күні" қарсаңында біз батыр құтқарушыларымыздың ескерткішіне гүл шоқтарын қойып, олардың ерлігін еске аламыз, бұл біздің парызымыз.
Өңір бойынша 9 айда 1826 рет әр түрлі оқиға орындарына шығу тіркелді. (оның ішінде 348 өрт сөндірілді, 11 суға кету оқиғасында әрекет етті.) Мамандардың кәсіби-жедел әрекеттерінің арқасында 283 адам құтқарылды, түрлі төтенше жағдайлар аймақтарынан 22 адам эвакуацияланды, 189 азаматқа медициналық көмек көрсетілді.
Құрметті әріптестер, Сіздер күн сайын қиын да қауіпті жағдайда түрлі сипаттағы қауіп-қатерге қарсы тұрып, батыл әрі шапшаң, жауапты да адал әрекет етіп, зардап шеккен жандарды құтқарып, шұғыл көмек көрсетесіздер. Бұл мереке – міне сіздердің осы қызметтеріңізге көрсетілген құрмет. Әріптестер мен ардагерлерді кәсіби мерекемен құттықтаймын.»
Қызылорда облысы ТЖД