Бүгін Өңірлік коммуникациялар қызметінде Қызылорда облысы төтенше жағдайлар департаменті бастығының орынбасары азаматтық қорғау полковнигі Бауыржан Ізбасаровтың және «Қазсушар» ШЖҚ РМК Қызылорда филиалы Су шаруашылығы нысандарын пайдалану бөлімінің басшысы Айдос Асанбаевтың қатысуымен брифинг өтті.
Брифингтің тақырыбы: «Арал ауданы Қамбаш көлінің бүгінгі ахуалы туралы».
Брифинг барысында Бауыржан Ізбасаров: «Кеше орын алған оқиға бойынша қаза болғандар мен зардап шеккендер, сондай-ақ елді мекендерді су басу қаупі жоқ. Салдарынан «Аққұмшық» жағажайындағы 6 демалыс үйі зақымдалған.»,-деді.
«Қамыстыбас көлдері жүйесіне каналдар арқылы - 387 млн.текше метр су жіберілсе, Ақшатау көлдер жүйесіне - 478 млн.текше метр су жіберілді. Көктемгі су көлемінің ұлғаюына байланысты Шардара су қоймасынан Сырдария өзенінің төменгі ағысына секундына 1300 текше метрге дейін тасталуда. Осыған орай, уақытша мол суды құрғақшылықтың алдын алу мақсатында барлық аудандардағы каналдар арқылы көлдер жүйелері мен шабындық жайылымдыққа алып қалуға тырысудамыз. Тиісінше Қызылорда су торабының төменгі ағысына секундына 600-650 текше метр су өтеді деп күтілуде», - деді «Қазсушар» ШЖҚ РМК Қызылорда филиалы Су шаруашылығы нысандарын пайдалану бөлімінің басшысы Айдос Асанбаев.
Брифинг соңында спикерлер журналистердің сұрақтарына да жауап берді.
Қызылорда облысы ТЖД
Қоғаммен байланыс тобы