Баспасөз орталығында өткен баспасөз конференциясында Қызылорда қаласы Төтенше жағдайлар басқармасының бастығы Түйменов Жасұлан Қалдыбайұлы оқыс оқиғаларды болдырмау мақсатында атқарылып жатқан профилактикалық жұмыстарға тоқталып өтті.
Қызылорда қаласында жыл басынан бері әр түрлі сипаттағы 165 өрт оқиғасы орын алған. Оның ішінде тұрғын үйлерде 114 өрт оқиғасы, көмірқышқыл газына улану фактісі бойынша 3 жағдай, табиғи газға улану фактісі бойынша 1 жағдай тіркелген.
Бұған көп жағдайда тұрғындардың қауіпсіздік талаптарын орындамай, жабдықтардың орнатылуына салғырт қарауы себеп болуда. Мәселен, тұрмыстық пештердің техникалық жағдайын тексермеу, электр сымдарының дұрыс жалғанбауы мен ескіруі, балаларды қараусыз қалдыру және пештің түтін шығу жолдарын тазаламау өрт оқиғаларына әкеп соқтыруда.
Қазіргі таңда газ пайдалануға орай орын алуы мүмкін оқыс жағдайлардың алдын алу мақсатында мейрамханалар мен тамақтану орындарында рейд ұйымдастырылуда.
Өткен жылы әлеуметтік тәуекел топтарына кіретін отбасылардың тұрғын үйлеріне көмірқышқыл газын анықтайтын датчиктердің 330 данасы орнатылса, биыл датчиктер 350 отбасының тұрғын үйіне орнатылады деп жоспарлануда.
Қызылорда қаласы Төтенше жағдайлар басқармасы